2014年7月22日 星期二

嵐山劏房戶難佈陣 風水師投降

蘋果日報

長實(001)樓神趙國雄連日為旗下新盤大埔嵐山解畫,噚日就話實呎得177方呎嘅單位都唔係好細。咁又係呀,今時今日呢個樓市,搵到個放得落張床、有廁所、有廚房嘅單位,仲想點?不過問過兩位風水師,佢哋不約而同話呢類咁細嘅單位,好難擺好風水,住入去好易周身病痛。

床頭對大門健康差

要間屋風水好,第一件事要搵位放置好屋主張床,嵐山呢個超細單位,內櫳客廳面積大約係8呎乘12呎,放張床都佔去一半地方,都唔好講其他擺設住。風水師麥 玲玲一望張平面圖已經皺晒眉,唔知點樣擺張床。佢指,床頭一定要坐實望空,有依靠,呢個單位只係得對住大門口,或者對住廁所門口,有牆可靠。
之但係,大門氣流強,床頭一定唔可以對住大門口,屋主對正大門口瞓覺,健康肯定有問題,精神亦會好差;廁所有穢氣,床頭亦唔適宜對到實;即使吊高張床,方位一樣,無補於事。
唯一辦法就係將廁所門換成暗門,表面見唔到門框,但係開門閂門帶來氣流,其實幫唔到好多。

單位細 宮位吉凶亂

另一位風水師區仲德指出,由於單位太細,將佢劃開九個宮位(每個宮位有不同吉星、災星),再放張床,張床可能踩中4個宮位,屋主瞓落床,「隨時個頭瞓喺財位,手喺病位,腳喺是非位,除非企喺度瞓㗎啫。」佢直言,唔多贊成買咁細嘅單位,呢類單位真係好難佈局搞好風水,「個人接收到嘅磁場會好亂」咁話。
老實講,就算話平,都講緊200萬買一個單位,買樓最重要都係住得好啫。

李華華

沒有留言: