2016年11月29日 星期二

拆息急漲 加息殺埋身 供款人士點算好?

on.cc東網專訊

【on.cc東網專訊】 美國加息殺埋身,1個月拆息今日再升至0.39714厘,比昨升0.00785厘,為2010年7月以來的高位,較今年低位累升0.2厘。《東網》即為供款人士拆解原因同影響。

1、點解近期拆息上升?
市場認為美國聯儲局12月加息機會率達100%,美元拆息已率先上升至0.6厘,港息自然有上升壓力。

2、拆息仲有無得再升?
金融海嘯之後一直有大量資金湧入港元,港元資金市場比美元更充裕,所以同樣1個月拆息,港元升幅無跟足美元,銀行界估計美國12月加息為0.25厘,拆息升幅已經差不多,不過12月時的1個月拆息,會有跨年因素,預料就算再升都係短暫。

3、1個月拆息關邊個事?
準備買樓同供緊樓都關事!因為市場上主流的拆息按揭(H),都係以1個月拆息做基礎,即係佢升幾多,閣下按息就會升幾多,直至升到P按封頂位。

4、準備買樓咪要供多咗?
如果同今年中拆息低位時相比,你唔會供多咗!因為銀行減按息已經幫你抵銷拆息上升,唔怕「變相加息」!銀行6月至今減新做按息達20至25點子,即係由當時H加1.6厘(H為0.2厘,實際按息1.8厘),減至現時最低H加1.35厘(H為0.39厘,實際按息1.74厘),仲平咗!

5、本身供緊樓點算?
供緊樓的確係會因為拆息令供款上升,升20點子,每100萬元貸款額及25年期按揭為基礎,每月會供多100蚊!
不過!閣下如果已過罰息期,而按息高於H加1.35厘,可以立即申請轉按,享受較低按息之餘,拎埋1%現金回贈!

6、未過罰息的按揭客應如何部署?
硬食,然後捱多半年至兩年等過罰息期轉按。

沒有留言: