蹺手等睇股指期貨好戲

蘋果日報

被挾親手指嘅淡友，梗係唔記得咗早幾日嘅溫馨提示——記得要貼市同唔好太大貪。高位扑儍瓜見佢挾番一兩支陽燭上嚟就好止賺，記住永遠係最「符碌」嘅人至可以沽到最高、買到最低，作為此欄讀者嘅專業投資者，最緊要經常令自己立於不敗之地，留得青山在，那怕冇柴燒。
近 日論市嘅分析員又好，股評人都好，似乎喺過年前都忍唔到口，語不驚人誓不休，年初話見 26000，最保守 23000，見跌時就唱跌話跌多啲至吸。有老友話若果跟實名家風向去買，基本上係日日高買第二日低沽。作為股評人，務求以理性角度分析大市，取向保守啲， 當賺餐茶錢，畢竟我唔信炒股真係可以發達，眼見身邊唔少「財來財去」嘅真人真事，有幾多食幾多咪仲開心。
地球的確很危險，突然有大行話樓市要升破 97水平，但眼見身邊炒友開始疑似 97年醉生夢死嘅炒樓生涯，新盤短炒兩日搞掂再追下一個，一夜間搵成年人工，引死隔籬，炒風就係咁擴散開去。

初期料成大戶樂園

炒時炒，大手出擊前唔該問吓自己到底年紀幾大、身家幾多、風險承受能力幾高、睇錯市有冇實力守落去、賺幾多先夠沽貨……否則可同我一齊返火星放吓假，開開心心過年後再返地球，因為左右大市嘅股指期貨將會喺 3月開通。
現 時各大券商已磨拳擦掌喺測試階段，表現唔好會被中證監 Foul出局，所以各大券商已預留超過 400億元資金應戰。綜合內地分析，大家對股指期貨睇法一面倒咁正面，有啲話中國係全球 20大 GDP國家中，唯一冇期指同孖展嘅市場，引入股指期貨將大大改變現時單邊市嘅格局。
學者列舉出喺金融海嘯後，美、英、韓等 22個有孖展同期指嘅地方，跌幅平均唔過 50%；中國及越南等 8個未有嘅國家，就平均跌 63%；有期指嘅新興市場跌幅亦較輕，只有 47%，唔似得內地 A股咁大跌 70%。
我同意以上學者所講，長遠的確係會令市場更健康，但短線由於唔受散戶玩，將成大戶造市嘅樂園，所以要小心觀察推出初期表現。

胡孟青