楊天命：兔年升到你唔信

睇下準唔準先 !

蘋果日報

通脹漲極都有、股樓隨時爆煲、貨幣戰爭搞到七國咁亂……虎年未埋單，成個地球嘅經濟似乎已經俾隻猛虎咬到蓉蓉爛爛，出年兔年，係咪可以祥和啲，和氣生財呢？
答案係未必！「出年好波動，我幫香港卜到支『離卦』，麻麻哋……」金融風暴嗰年喺最高位嗰日、唯一一個叫人沽晒啲貨俾人喪插，之後金融風暴爆發、唯一一個算中此劫而俾人力捧嘅玄學大師楊天命，喺佢本 12月面世嘅《兔年運程》出街前，率先披露佢嘅來年預告，「兔仔，可能仲惡過老虎！」

香港仍波動　中美續互片

「我每年會去一個最當旺、最容易同個天溝通嘅地方起卦，今年去咗新加坡，個天只係答咗世界、中國同美國，香港唔肯答，全部卜到六沖卦……六沖卦其實係主唔好 o架！」楊師傅話，香港支卦仲要係返到嚟香港再起嘅。
「返到嚟香港再揀番個吉日，個天先肯答我，卜到支『離卦』，本身係代表依附，咁橋又係六沖卦！我第一次寫運程書所有國家或主卦係六沖卦，六沖卦就係最大嘅波動！」中國同美國嗰支，分別係『乾卦』同『震卦』，中美兩個大國會繼續出招互片，「一定會好好睇！」

熱錢好大嚿　基金賺大錢

楊師傅又話，出年嘅情況，會係一大嚿錢嚟一大嚿錢走，「熱錢係有史以來咁犀利，震盪亦係有史以來咁犀利！」
咁即係有幾震盪呢？「出年係容易有個大升，會升到你唔信……有 3個好關鍵嘅月份，農曆 3、 5、 9月，而最高位可能喺 5月出現！」特別之處，係出年極有可能股樓同步，「今次未必股市行先，大家一齊調整都唔出奇！」佢本新書，封面就係喺地產代理舖前取景，認真夠 eye catching，擺到明要抽地產水。
咁開講有話危中有機，亂世至有機會發大財，出年邊類人最發達呢？「立立亂嘅時候，亦係基金搵食之時，出年班基金會搵大錢！」係 o架，大鱷索羅斯應該都同意楊師傅嘅諗法，佢個香港 office已經開張大吉，預備明年大展拳腳，索羅斯可能已經搵過高人指點都唔定。

李華華