中港直通巴偷竊案飆升

蘋果日報

【本報訊】近兩個月，中港直通巴士站的行李偷竊案突然飆升，個案之多，被形容為10年罕見。賊人手法純熟，一旦被發現就訛稱拿錯行李甩身，要捉賊拿贓極困難，荃灣站務員何建良本月初卻憑「笑笑口」禮待賊人而助警方破案。
記者︰龔蕙芝

月初在荃灣德海街直通巴士站成功捉賊的何建良憶述，賊人會佯裝客人，在巴士行李艙擺放行李，車未開就扮上錯車，「佢明知架車係去廣州，專登問你幾次『係唔 係去祈福新村？』之後就拎人哋嘅行李當成自己嘅」。何連續兩日與賊人接觸，第一次讓竊賊走甩，「因為兩班車只相隔15分鐘，正常一定係企喺度等，但佢急急腳行開我先懷疑，已經追唔切」。

禮待疑犯減戒心

翌日疑有人食髓知味，案件重演，何說：「手法一模一樣，上廣州車又係問『係唔係去祈福新村？』我專登笑笑口話唔係，因為你一惡佢就唔敢落手。」賊人果然取了最靚的行李篋，何為怕賊人偷走，故意拖延時間，「望實佢叫佢企埋一邊等一陣」。同時間在車上廣播，着客人落車「認篋」，結果當場人贓並獲，賊人亦無法出示車票。報警後不消10分鐘，即有數名便衣探員到場。
到場警員亦對何說：「呢啲賊好難捉。」因為通常賊人失手時會推說「拎錯行李」，「可能我個樣唔叻，見我笑笑口就冇戒心」。事後何獲警方提名角逐好市民獎。
「10 年加埋都冇幾單，唔知點解呢排會咁誇張」，另一名在荃灣做了超過10年的站務員劉女士指，今個月首11天內就發生了六宗行李失竊，均在繁忙時段（早上7時 至9時、下午12時半至3時）發生，由於該站有六間直通巴公司，同時可有五架大巴埋站上客，擠滿近百名旅客，「容易趁亂行事」，尤以去廣州和江門等多客的車為甚。

「以前幾年先一單」

此外，位於太子砵蘭街的直通巴士站，9月亦發生了四至五宗失竊，站務員黎女士表示：「有啲係架車去到深圳灣，先知行李喺呢度（太子）俾人拎咗。」事件全部發生在該站繁忙時間晚上7時至9時，她指由於巴士埋站上客時間短，工作人員忙着安排客人上車，難以全程一眼關七，所以現在各公司都在晚上加派人手，「以前係幾年先會有一單（行李盜竊）」。
灣仔也有直通巴士站，但職員透露：「呢邊（站頭）好分散，一間公司一個點，站務睇得到，冇咁易落手。」警方表示，沒有行李失竊的罪案分類，不能提供相關數字；但證實本月初在荃灣以盜竊罪拘捕一名在跨境巴士站偷行李的女子，調查後暫未發現案件涉及集團操控。