儲局百周年 難得四代同堂 三任主席話當年

美國咁快就已俾人吸血100年啦 ?

蘋果日報

下周一係美國聯儲局成立100年，前日先喺大本營舉行慶祝活動，曾經掌管美國，甚至全世界經濟命脈嘅三位仁兄，包括兩位前主席沃爾克、格林斯潘，同埋明年 2月就變「前任」嘅伯南克難得高調聚首，加埋即將接替伯南克嘅耶倫，變成四代主席同堂。

主席齊脫髮　男人最痛

沃爾克、格林斯潘、伯南克喺慶祝會上輪流懷緬過去。沃爾克話佢在位時，息率高達20厘，通脹率達雙位數，搞到好頭痕，依家息率接近零，伯南克卻要擔心通縮。
格林斯潘1987年8月接替沃爾克做聯儲局主席，兩個月後發生股災，最驚莫過於此。不過佢認為，聯儲局當時已經盡晒力應對。令伯南克印象至深嘅，當然係2008年金融海嘯。

三位主席帶領聯儲局應付好多挑戰，可能諗計太多，諗到甩頭髮，一望三人，最大共通點就係男人最痛，冇乜頭髮。
沃爾克有好多花名，因6呎7吋高，俾人叫Tall Paul，耶倫拍埋去，變成小矮人。佢又鍾意雪茄，又名「雪茄沃」。
格林斯潘係繼William McChesney Martin後，史上任期第二長嘅主席，任期為約18年５個月，亦係三位主席中年紀最大，今年87歲。咪以為佢哋呢類經濟人冇乜情趣，格林斯潘同伯南克都識吹色士風。

伯南克今年60歲，一把濃密鬍鬚成為佢嘅標記。佢做緊儲局理事時，曾建議日本央行「好似喺直升機上撒鈔」，要日圓貶值同埋買債，之後一直被人叫做Helicopter Ben。