80後盲搶日本樓 小心中伏渣都冇

蘋果日報

【壹週刊】香港近期掀起一股炒日本樓熱潮，東京一個二百呎嘅「上車盤」，最平只喺40萬港元(500萬日圓)，咁嘅價錢喺香港連車位都買唔到！不過本刊上月到日本直擊睇樓，發現買日本樓暗藏四大風險，就連多位資深嘅「日本通」,例如東瀛遊老闆禤國全、獅子山學會總監王弼同埋759阿信屋老闆林偉駿，齊齊向日本樓Say No。

點解佢地都唔想買日本樓？因為當地樓價明升實跌，以東京為例，過去兩年樓價升咗20%，不過日圓兌港元匯價就貶值咗 23%，以1000萬日圓嘅樓嚟計，兩年前要100萬港元，就算現時升值至1200萬日圓，但兌番港元都只係91萬，扣埋利得稅實收86萬，Hold貨兩 年蝕咗成14萬！

第二個風險就係，當地租務市場好大競爭，出租率其實跌緊，好似王弼四年前喺北海道買咗個單位，當年回報有成20%，但現時急跌至9%，搞到佢都唔敢再投資日本樓。

第三個風險就係當地二手市場成交疏落，外地人冇得喺日本按樓借錢，只可以賣樓套現，但如果要急放盤，就要劈價，隨時蝕入肉。最後一個風險，就係買樓過程相當兒戲，除咗冇得睇樓，匯錢都只能匯入日本中介公司，買家要承擔中介走數的風險，隨時血本無歸，就算收到屋契，喺香港都查唔到真偽，冇保障可言。