Bitcoin櫃員機 登陸深水埗吸宅男

蘋果日報

呢部機係乜東東？唔好睇佢放喺部汽水機側邊咁「親民」，其實佢係一部比特幣（Bitcoin）ATM，即係可以入錢買Bitcoin又或者入Bitcoin換錢。
部Bitcoin ATM喺深水埗黃金商場，嗰度聚集鍾意長時間對住電腦嘅宅男，當佢係電腦電子產品擺賣真係fit晒。
Bitcoin個價好chok，舊年曾經炒高到每個值1,137美元，今年4月跌到得番340美元，現時上返607美元。呢部機預計本周五開始有得用。
其實港府早前已經提醒，虛擬商品喺香港唔係法定貨幣，價值冇實物、發行人或實體經濟支持，兌換同交易時風險相當高；匿名交易仲可能造成潛在洗黑錢風險，所以當玩吓好啦。