等．一個人．蟹民

今日恒指升成5百幾點, 又一班人高位搶貨 !

蘋果日報

每一日，這個時間，這間咖啡室，都有一個極具氣質的高貴女人，坐在靠窗的那個位置。長髮美人、精緻的咖啡室，把這一切唯美的事物配搭起來，根本就有如置身電影場景。我不知道她姓甚名誰，唯一知道的，是她每日都不停的，不停的嘗試打出一個電話，但從她失落的表情，我就知道，電話的另一端，根本從未打通過。

到底，她每日尋找的那一個人，是不是一段想愛而不能愛的愛情？出於好奇之下，這一天，這個時間，我選了靠她最近的位置，把耳筒塞在右邊耳仔，邊聽著收音機財經台（原諒我作為一個經紀的職業病），邊希望為她打氣。如果幸運的話，說不定可與她一起迎接這一通等了又等的電話。

這 一天，她開始她的例行工事，瞥見了一個未知的電話號碼，只見她不停的，用那纖幼的指尖反覆按「Redial」。而我耳筒中的電台節目主持，亦循例地報恒指 點數。就在電台財演說話的時候，終於，眼前的她可以將電話安定的貼著耳朵，眼看她那充滿希望的眼神，我就知道，我的祝福是有用的！

「喂？」從那顫抖的聲音就知道，她心情應該很激動。「大師…」奇怪，為甚麼跟的右邊的電台聽眾聲音重疊，難道…「我想問我1.98元買第一上海（227），幾時返家鄉？」

晴！天！霹！靂！

呢一個一直喺我心目中嘅女神，每日鍥而不捨想搵嘅人，竟然係財演！我知錯，錯就錯在自小先入為主，以為靚女背後一定有個浪漫、淒美、夭心夭肺的愛情故事。我應該要提醒自己，當Hello Kitty原來唔係貓，香港小姐唔係選靚女，世界根本冇嘢係必然！

冷靜落嚟，將精神集中喺財演的回應：「哈哈哈！甘叻1.98元呢個位都比你買到。」嘩！呢句「哈哈哈」，如果我聽到真係會喊出來，要知道1.98元，最近只 係8月6日出現過，係7年半以來最高最高嗰一個Point，而升到呢個高位後，唔好話冇得升，之後仲要被大戶洗倉，早兩日最慘跌到去1.38元，高位跌足 三成！

被寸後，她眼中那一泡眼淚不住的流下，眼珠一滴接一滴，沿著她的面頰下跌，就彷彿看一次第一上海被大戶洗倉時的股價圖。

此 時，主持還要落井下石，「唔係笑你，但真心覺得你叻。你望下個圖，潛伏N年都唔買，滬港通都講咗咁耐，4月、7月兩個月都破位，你又唔買，講近啲，8月4 號支大陽燭你都唔買，偏偏8月6號先接火棒。」財演搭嘴：「不如你以後打多啲電話上來，我哋需要你咁有指標性嘅聽眾。哈哈哈…」

一輪笑聲後，電台傳來「Doo…Doo…Doo…Doo…」Cut線後的聲，她趴在枱上哭起來。又是一個唯美的畫面，但我唔會來擅自加入美麗的幻想，正如我唔會再對2017真普選存有任何幻想一樣。我走近，坐在她的對面位。

「我啱啱聽咗電台，你買咗好多咩？」聽到我主動問及她的傷心事，她忍不住抬起頭，訴說佢嘅心路歷程：「4月初聽到滬港通後，我見幾日升咁多，我唔敢買。之後隻股真係跌返落嚟，我就冇理。去到7月，佢開始行，我想買，但又驚，諗咗幾日，見到佢係咁升，心諗個勢咁勁，於是問銀行朋友，佢話呢隻嘢OK，於是決定瞓身 博一博，點知就摸頂…」

散戶就係散戶，永遠以為做銀行就一定識股票，「呢隻嘢OK」呢一句，一聽就知係「Hea答」。Hea嘅程度，等如 有人問我買邊隻股好，我答：「買盈富基金（2800）。」一樣咁Hea。散戶心態，唔信自己，反而去等得到一個唔識股票嘅朋友嘅認同，呢套邏輯同「中央是港最大的民主派」呢一句說話一樣，諗一世都唔會明。

看見佢標緻的臉喊到對眼紅晒，的確我見猶憐。我於是決定，「我做股票行嘅，如果你信我，不如沽晒第一上海止蝕先，然後買呢一隻…」我喜歡在餐廳杯墊上寫字，很是電影的橋段。我寫上一個股票號碼。

「真係得？」「信我！呢隻話賣殼！升硬！」

佢果然真係用手機登入證券戶口，啱啦啱啦，快盡早止蝕第一上海，快啲快啲…

快啲狂掃我嗰隻，反正我今朝要出貨出唔到！

散戶心態，永遠擺脫不了number降的魔咒。唔知頭唔知路就幫人接貨，俾大鱷食咗都唔知。雖然佢好靚，但…

在孤獨的投資路上，靚，係冇著數的。

「我1.49沽晒啦，我用全部錢買你嗰隻啦，你睇。」她向我展示手機內的交易紀錄，個、十、百、千、萬，5萬蚊？所謂「全部錢」就只係5萬蚊！5萬蚊我出到幾多貨呀？

「呢度真係你所有錢？」「係呀，係我股票戶口嘅全部錢架啦。我呢啲咁驚青，最多都係敢用5萬去投資，其他錢都做晒定期啦。」

聽到之後，我呷了一口咖啡，望一望第一上海，今日升咗7.3%，報1.61元。

完

千頌C@堆填區