疑伺服器出錯 陌生人可收看畫面 IP Cam無設密碼 家中「真人騷」任睇

蘋果日報

【本報訊】網絡攝錄機（IP Camera，又稱IP Cam）可透過手機隨時隨地遙控監察，近年成為不少家居和辦公室的防盜好幫手，但有用戶因為無設定密碼，令私隱變成「真人騷」。有專家指用戶忽略設定密碼重要性，當伺服器出錯，猶如中門大開，相當危險。
記者：潘婉玲

「我睇到人，點知有冇人同時睇緊我？」Anna（化名）於一年前在灣仔一個電腦商場，以780元購得兩個網絡攝錄機，放在客廳和睡房監察兩歲女兒在家中的情況，一直相安無事。惟上月中，Anna開啟手機發現睡房的攝錄機畫面，竟顯示陌生人家中的客廳。
「當時突然閃一閃，去咗人哋屋企；再閃，去番我屋企；跟住又閃，去番人哋屋企」。Anna表示，連帶攝錄機編號也轉變，從原本的4193，變成4194。她向記者展示手機畫面，清楚看到兩名男子赤裸上 身與另一女子在客廳吃飯，並以廣東話交談，一隻疑似貴婦狗於室內遊走，亦一覽無遺。從客廳格局看來，應是公屋單位。

有聲有畫可zoom近睇

Anna更嘗試將對方的攝錄機鏡頭左右旋轉，望引起對方注意，讓對方得以處理，「我想佢哋知道我睇緊，但佢哋完全唔覺。如果我想，我直情可以zoom近去睇！」最恐怖是攝錄機有聲有畫，更可錄製畫面，她擔心自己的私隱也同時外洩，因她睡房的攝錄機放於床邊，對正洗手間，隨時成為「真人騷」女主角，「我沖完涼乜都唔着就咁行出嚟」，她隨即將IP Cam拆走，關閉所有鏡頭。
對科技一竅不通的Anna坦言，當年安裝網絡攝錄機，只按說明書指示下載手機程式後，輸入機身編號，連接家中無線網絡（WiFi），過程只須數分鐘，惟她並沒為攝錄機設定密碼，「成個過程都冇叫我set密碼」。她事後到店舖查詢， 店員卻一問三不知，稱事件聞所未聞，「佢哋講咗句『可能個server有問題』」。Anna認為事件荒謬，望能引起公眾關注，「好多媽媽都會用Cam，我想大家知道呢個問題」。
該款網絡攝錄機的代理商訊靈科技回應，公司產品從沒出現類似情況，而投訴人從沒向公司反映，故需要更多時間進一步了解，再作評論。

儲存及發放畫面屬刑事

律師梁永鏗指出，無論對方有否設定密碼，投訴人此舉已可能觸犯個人資料私隱條例，「正如你見到人哋冇鎖門，你入咗去覺得『唔錯喎，用吓你啲嘢先』，咁係一定唔得」。
梁又警告，假如將有關畫面儲存及發放，更須負上刑責，最高刑罰可監禁五年。

蘋果日報

【本報訊】平價IP Cam成行成市，記者到過深水埗鴨寮街多間科技店，發現價錢普遍從300多至700多元。其中一店員向記者力銷300多元的鏡頭，聲稱備有夜視鏡、可旋轉鏡頭、對話等功能，安裝過程極方便，「插網線，電話一掃個QR Code就得，唔使密碼，成個過程四分鐘搞掂」。店員隨即以手機示範，「嗱，一掃部Cam個QR Code就搞掂，依家就用得喇」，但無提及保障私隱的安全問題。
而另一間科技店店員則推銷較貴價型號，但同樣沒提及加設密碼。直至記者詢問，店員才表示：「你可以自己設密碼，但我自己未試過，等我搵一搵。」

用雲端賬號較安全

越方便其實越危險，幾乎每月銷售逾千部IP Cam的生產商壹壹科技行政總裁陳國良指，平價IP Cam安裝時，需存取家中的WiFi資料，包括IP地址，「如果你嘅舊IP轉咗，但伺服器仲係保留舊IP，而舊IP俾人用咗，就會去咗人哋嗰邊」。陳教路，用戶可選用有品牌保證的公司IP Cam，因用家要先開立雲端賬號及設定密碼，再為IP Cam設密碼，更可將影像儲存於記憶卡，而不經伺服器，進一步保障私隱安全。