網購成癮：模型堆到天花板 動漫男孭一身債

on.cc東網專訊

【on.cc東網專訊】 智能手機上網一按即買，網購上癮隨時一身債。本港有調查指出，逾7成港人網購愈買愈多，根據本港1間戒癮中心資料顯示，發現網購活動除有增無減外，亦有人因此難以自拔，過去兩年收到54人求助，當中10人更被診斷為網購成癮，即無時無刻都會上網購物，甚至陷入失控式喪買程度。1名30多歲動漫男瘋狂網購近 萬件漫畫模型玩具，「戰利品」放滿家中客廳睡房，更囤積至天花板高，活動範圍只剩梳化及廁所，更因此欠下40萬元，最終要變賣模型還債。

一推門走進動漫男阿古天地，1個接近400平方呎單位內，你不會看到窗，不能走入房，只會看到1個「森林」，1個由玩具、漫畫及模型等堆成的「動漫森林」。 1盒盒機動戰士高達模型由地板疊上天花板，部分仍未開封。數千件扭蛋玩具放在膠箱中堆成小山，1本本漫畫則築成1幅牆，單位活動空間僅剩下2條僅1人容身的通道，分別通向廳中梳化及廁所。他亦不諱言：「入唔到房，平日玩同瞓都喺梳化。」從事設計工作，自小接觸電腦的阿古10年前開始網購，「主要係上拍賣網，搵吓特別版模型，後嚟自己1個人住，開始想執平嘢，平買貴賣當投資，但始終啲模型係自己鍾意，想賣出去嘅唔多。結果買多過賣，網上買返嚟嘅嘢，喺屋企愈堆愈多。」瘋狂時，他每日無論上班還是放工，都透過智能手機或電腦上拍賣網流連，「睇下有無人放平貨，又或者自己睇中嗰件貨有無人爭，見個拍賣品就夠鐘截單又諗下買唔買好。有時放工無嘢做，返工悶都會上拍賣網，開心時會買嚟獎勵自己，唔開心又買，想令自己開心番，1星期總有3、4日有收穫。」阿古月入萬多元，扣除日常開支，加上網購，已弄得山窮水盡，每月至少要透支3、4千元，要透過碌卡應付，結果因網購累積欠下債務最少10萬元，去年連同其他債務及利息開支，最終欠下近40萬元，無奈下向戒癮中心求助，最終要將大部分珍藏出售，清還欠債。

「網購服務不限時間地域，不論在家、公司或任何地方都可購物，而商品睇得多，購物慾亦強，購物金額及次數愈來愈多。」東華三院心瑜軒中心主任陳美璐表示，近年網購日趨嚴重，求助個案愈來愈多，主要為39歲以下，有一定消費能力的青年人，每人購物種類雖不同，但共通點都會買下一些「無謂嘢」，且愈買愈多，若未能買到，會日思夜想，「有個案唔瞓覺，唔出街，唔買嘢就會坐立不安，對所有東西都提不起興趣，部分人更因網購嚴重欠債，失去工作，最終破產。」

協助阿古的輔導員伍子湛表示，阿古童年生活不富裕，渴望如其他小朋友得到玩具，首次收到模型作禮物時無比興奮，長大後不停購買模型，回味快樂時光，並紓解生活苦悶及處理情緒壓力，導致網購上癮。