魚缸通：股海奄悶 轉打麻雀

on.cc東網專訊

【on.cc東網專訊】 大市冇方向，成交奀得可憐，股友心都散晒。致富證券大圍分行經理石泳傑(Victor)話，分行好熱鬧，但個個都無心戀戰，全部落到嚟只係齋吹水、約麻雀腳，落盤電話靜過鬼，打嚟多數都係查詢iBond認購。

「即使係平時出名勤力嘅股友都收埋鑊鏟，投晒降。」佢話，大升陰升陰跌，完全捉唔到路，呢類散戶依家望住50大升幅榜都唔敢落手。

不過，仍有少數勇士照炒細價股，好似建業建榮(01556)，同埋亞積邦租賃(01496)；前者下月派特別息，吸引佢哋細細注喺除淨前玩短線。建業建榮普遍買入價為0.42元、0.445元出貨，埋單賺1,000大元；亞積邦租賃就多數0.69元買入，望博升3格即閃。