騰訊挑戰Model S 揭Tesla安全漏洞

一早說過唔敢坐 !

on.cc東網專訊

【on.cc東網專訊】 正當大家憧憬自動駕駛系統Autopilot嘅應用有幾咁厲害，忽然爆出特斯拉(Tesla)旗下Model S有安全漏洞。話說一家知名嘅白帽黑客－－「騰訊科恩實驗室」上載一條影片，影片顯示原來可以透過「無物理接觸遠程攻擊」，成功隔空入侵同遙控Model S駕駛系統，即係由「自動」變咗「他動」，聽落相當恐怖。

影片全長8分49秒，前半段展示了Tesla Model S P85在停車模式時，可被人透過網絡入侵駕駛系統，繼而可以遙距控制車內的顯示器、天窗、方向燈，以及坐椅，更可以在沒有解鎖的情況下開啟車門。影片後半段，則以Tesla Model S 75D作示範。在Tesla Model S 75D行駛模式時，可以成功控制水撥、倒後鏡，以及車尾箱的開關。最值得留意的是，「騰訊科恩實驗室」成功遙距控制，令本來行駛中的車輛突然煞車。

騰訊科恩話，團隊喺過去幾個月嘅研究發現，如果Model S被接入惡意嘅WiFi熱點然後上網，黑客有機會對駕駛系統作出遙控。科恩發現有關安全漏洞後，已經即時同Tesla報告，又話合作修復漏洞乜乜乜。 Tesla都知驚，依家透過OTA無線方式為全球嘅Model S進行系統修復，以求解除威脅。Model S車主有乜符？咪就係按照Tesla嘅提示，盡快更新最新官方軟件囉。

據了解，呢間騰訊控股(00700)旗下嘅「白帽黑客」團隊發現漏洞後，被封為「鋼鐵俠」嘅Tesla行政總裁馬斯克(Elon Musk)，已經在Twitter被網友追問，事件是否反映Model S有安全風險，馬斯克強調只屬個別事件，至今未有Tesla車主受到影響。

唔講唔知，「白帽黑客(White Hat Hacker)」嘅天職，就係主動出擊，務求盡早發現網絡與軟件安全漏洞，費事畀位黑客入。而騰訊科恩之前已經連續4年參加國際黑客大賽，仲贏咗8個單項冠軍，可謂網絡保安行業嘅「白帽高手」。

Model S被黑客隔空入侵，是否會影響Tesla的銷情呢？新鴻基金融財富管理策略師溫傑認為，由於Tesla已主動與騰訊科恩合作處理有關問題，加上今次不屬於 惡意入侵，相信事件不足以打擊車主對Model S及Tesla的信心。不過他承認，黑客入侵風險令自動駕駛技術可靠程度受挑戰，車主對有關技術會有更強戒心。