遊60秒Lift河 袋走78萬！

on.cc東網專訊

【on.cc東網專訊】 遊60秒Lift河，可袋78萬元資本？！講緊係初創企業點樣把握搭電梯嘅1分鐘，向潛在投資者Pitch自己條創業橋。今次若撼贏另外99間初創隊伍，呢筆78萬元創業資金就落你袋！

話說，之前喺巴黎艾菲爾鐵塔搞過嘅環球電梯募投比賽(Elevator World Tour)，今年係第4屆，首次移師亞洲，仲揀咗香港。今次係香港科技園公司與專搞初創企業活動嘅組織STARTUPFEST共同主辦，10月13日會喺九龍站環球貿易廣場(ICC)100樓天際100舉行。

點玩法？呢個係模擬初創企業喺電梯內向投資者路演嘅比賽，參賽者要喺ICC天際100搭電梯時嘅短短60秒內，向2位評審介紹生意Idea，務求1分鐘內冧掂評審。

今次有100間初創企業參賽，全部亞洲公司，唔少係香港公司，好似Capheart急救心、Gaifong、Living Tissues、Pokeguide、Well Being Digital等等，最終勝出者可奪得10萬美元(約78萬港元)嘅種子資金。

點Pitch橋先最突出？有創辦初創企業經驗嘅過來人貼士係，記住要提出目前市場面對嘅問題、公司有咩方法解決、業務進展到咩地步，嚟引起對方興趣。仲有，團隊能力係初創企業嘅重要元素，所以要令投資者認識公司團隊、有咩相關經驗同人脈等。想學嘢？比賽有facebook同YouTube直播，自己上網睇。