如果明年上半年股市跌, 要諗下買乜股先 !
on.cc東網專訊【on.cc東網專訊】 今年大市有波幅無升幅，難怪啲股友們都話無乜斬獲，對深港通無推升到港股，就至為失望！
散戶盧先生：「今年投資成績普普通通，成年入咗大約10隻股，全部蝕多過賺！講到最失望就梗係深港通啦！完全冇預期咁好，啲藍籌股都唔係咁掂，新世界發展(00017)叫平穩啲囉！出年仍然有好多變數，例如美國候任總統特朗普上場，預計息口會升，所以上半年會以保本為主，搵啲有息派、市盈率冇咁高嘅股票。」
元朗「股神」曾錦安：「股票今年就冇買，但買咗期權同牛熊證。記得6月尾，畀我估到英國脫歐，我買的期權就轉手賺幾十萬港元。但最激氣就係美國大選！我都估中侵侵贏硬，個走勢似足英國脫歐！點知要番工冇入貨，結果真係大跌後又升幾百點！激鬼死我啦！明年係2017年，且逢7必有股災，明年個市會幾震，但『上帝叫你滅亡，先要你瘋狂！』所以明年第2季個市升穿24,000點後，大家就要小心。」
散戶Jimmy：「2016年都買咗好多隻股，但整體成績都麻麻哋啊，上半年個市真係唔太好，係下半年先叫稍為好轉。我2毫嗰陣買咗隻順龍控股(00361)，之後升到4毫都賺咗成倍；但早2星期買咗隻宏安地產(01243)(02924)0.98元買入，點知佢竟然1拆10，後尾升到1.6元，但呢幾日忽然跌穿1.2元，真係好失望！」
散戶Kristy表示，「買開長和(00001)、滙豐控股(00005)及電能實業(00006)等藍籌股，今年全年資產升值約15%，但從計術分析見到沽出訊號，故已全部沽出；預計下年股市年頭會向上，之後或會跌到17,000至18,000點，到年中至年尾會抽升至24,000至25,000點。」
內地散戶黃小姐﹕「今年內地個市冇預期中好，而且今年冇咩收穫。我買咗深股方大集團(000055.SZ)同滬股百大集團(600865.SH)，但估計方大今年升市無望，反而我會睇好百大集團，始終佢係零售股，預期佢過年後可能會升。至於明年，我打算會買香港股票，我比較睇好華潤系同埋金礦股。」
比富達證券研究部主管林嘉麒表示，「趁今年初低位時入市，個人投資策略較為保守及長線，以環球基金產品為主，總結全年都有約20%的投資回報。我估2017年都會係難賺錢的一年，同樣要把握入市時機，相信第1、2季會有入市機會，目標於指數股份，但要定下止賺目標，唔好太長線」。
過往幾年有雙位數投資回報的耀才證券研究部總監植耀輝就話：「今年全年投資回報約10%，主因低位時分批撈入騰訊控股(00700)以及載通(00062)，另亦有投資細價股來考考自己眼光」。他預期，「2017年將會愈來愈難玩，因為美國候任總統特朗普上任後政策帶來變數，而我個人投資上都係繼續傾向保守，以騰訊為主打，其他細價受則小注投資」。
新鴻基金融財富管理策略師溫傑稱：「今年特朗普意外地勝出，令我之前買落的黃金相關基金大失預算；而美股在大選後大升，亦錯失了投資良機；不過好彩在第3及4季於港股的細價股搵到機會，平均來計，全年約賺10%，2017年要繼續審慎，要睇定先下注，個人就睇好美元高息債券，以此作為核心投資產品。」
沒有留言:
張貼留言