退休每月使費「基本」要幾多？

on.cc東網專訊

【on.cc東網專訊】 兩公婆想舒舒服服退休，每個月使費竟然要3萬？滙豐公布《滙豐退休策劃指標》最新數據，以二人家庭為例，「基本」退休生活模式每月預算大約係9,165港元，而「舒適」生活預算約29,530元，「豐盛」生活預算更加達到47,660元。

退休到底要使幾多錢，真係非常難預算，好似要簡簡單單有個「舒適」生活咁，舊年滙豐個統計都仲講緊每月28,890元，今年已經咩都加晒價，升咗2.22%至到29,530元，其中通脹得最勁嘅係房屋同食物。唔通真係要大學生一出社會工作，政府筆Grant Loan都未還就開始儲錢退休？靠MPF(強積金)隨時「基本」退休生活模式都搞唔掂呀！

講開MPF，俗稱「懶人基金」嘅預設投資策略(DIS)明年4月1日就會正式出爐，滙豐保險退休金主管葉士奇(Alfred)話，為咗做好通知成員嘅工作，佢地Call Centre都請多咗人，可應付多兩成查詢。

至於大家最關心嘅強積金回報同收費，Alfred話佢哋24隻基金入面，超過80%嘅表現高過該基金類別嘅中位數。小記都係嗰句，齋靠MPF退休？你絕對諗多咗。