慳仔慳妹嗌移民！港物價激貴 油價冠全球

on.cc東網專訊

外媒howmuch.net根據《經濟學人》雜誌早前公布嘅《全球十大城市生活成本》調查，總結出呢十個城市最適合那類人士居住嘅指南。整體嚟講，就算唔計樓價，新加坡同香港整體物價係全球數一數二！

物價雖然貴，但呢十個城市彼此間比較下，howmuch.net就總結出不同人士應該點樣選擇在那個城市居住嘞！好似香港地少車多，howmuch.net發覺到過去10年，香港油價一直係十大城市中最貴，每加侖超過6.5美元(約50.7港元)，所以電動車市場喺呢度絕對有發展潛力。

所以如果想慳油錢，建議你不妨考慮移民到紐約，因為佢哋嘅油價係咁多個城市中最平，一加侖都係2.3美元(約17.9港元)。不過，如果你係煙民就要考慮清楚喇！因為一包煙都要成14美元，係10年前嘅double。

麵包最貴係邊度？竟然係首爾，嗰度嘅麵包同餐酒係咁多個城市之中最貴，一磅麵包要成6.72美元，足足貴過位於榜尾嘅新加坡4倍；同時亦相對10年前貴咗2.5倍。至於餐酒方面，首爾一枝普通嘅紅酒，竟然都要近27美元，如果唔想飲到窮，就要去日內瓦，當地一枝酒只需要8美元啫！