首富教路：大學揀呢3科 最能改變世界

on.cc東網專訊

準大學生或準大學生嘅阿爸阿媽注意！入大學揀邊科最有前途？全球最有錢嗰位話，若畀佢生於依家，佢大學會揀呢三科讀：AI(人工智能)、能源、或生物科學。

講嘅係微軟創辦蓋茨，佢周一喺Twitter發文話，若畀佢今時重返校園，佢會以上三科揀一去主修，話喺呢三個範疇發展最能夠改變世界。

呢三個範疇前景點？不論科技與經濟專家都話，未來廿年AI應用將反轉工廠、建築地盤及零售業。

至於能源方面，全世界都想開拓更多太陽能及風電等能源，連蓋茨本身都預言過話15年內會出現「能源奇迹」。

生物科技就更加唔使講，單是美國市場就已增長驚人，啲私人公司爭住發展藥物及療法去對治啲已經唔驚抗生素嘅病菌。

報咗Jupas(大學聯招)，諗諗吓想轉科？下周二(5月23日)中午前仲可以轉，咪話唔提你。