87股災30周年：老中青一人一故事 有笑有淚

on.cc東網專訊

周四(10月19日)係87股災30周年，30年前嘅10月19日(號稱「黑色星期一」)，美國道指急挫近23%，觸發全球股市狂瀉，香港股市仲破天荒停市4日，話畀啲時間大家冷靜吓，結果26號復市嗰日恒指暴瀉逾33%，即是等如現時你瞓醒恒指忽然冧9,500點！

呢場87浩劫有幾觸目驚心？得到啲咩教訓？驚唔驚股災好快又嚟過？以下老中青金融人一人一句，有笑料有洋蔥。

====================
【元朗股神　曾錦安】
「當年好傷呀！當日喺銀行返工，開市前大堂相當嘈，但10點一開市恒指狂跌，成場一粒聲都無，全場淨沽冇入。停市4日，我失眠4日。我揸住期指，輸10幾萬，當年可以夠買到樓！依家諗番起都覺得驚，記憶永遠唔可以消除！之後買股票都有戒心，不過都冇得驚咁多啦，(現時)個市應該未跌住。」

【股壇老行尊　蔡陳葆心】
「當年剛啱去咗美國探親，眼見美股16號大跌，我19號即不計成本沽清所有股票，連期指好倉都平埋倉，結果當日美股急瀉，到港股26號復市時幾乎只得我喺度收錢！87股災改變咗我人生，要捉我入去交易所做管理層！」

【眾利股票主席　董偉】
「當時股市停市4日期間，市場資訊唔流通，搞到一復市就亂，證券行孖展都Call唔切，期指又出現拖數，同業資金不足，股票交收變成用銀行本票，因為怕支票無法兌現。嗰次最大教訓係唔應該借錢買賣股票。」

【民眾證券董事總經理　郭思治】
「當年我任職時富集團股票部經理，每日有3,000萬生意。不過股災前幾個月，我覺得個市太熾熱、太唔健康，於是我就不斷叫人沽貨，時富當時喺我帶領下，一毫子損失都冇！雖然87股災殺傷力好大，但好彩香港有出口、旅遊同建築業支撐，所以復原得幾快。至於今年，我覺得恒指升到上28,000、29,000有回吐係好正常，而資金流亦冇太大變化，所以都冇機會會有股災。」

【豐盛金融資產管理董事　黃國英】
「當時我啱啱入大學，完全冇睇股市冇買股票，唯一印象係當時屋企人嘅朋友炒期指被證券行斬倉，輸咗好多錢，但唔斬應該輸得仲甘。我覺得依家股市體系成熟咗唔少，慢牛繼續，就算調整都只會有最多一至兩成幅度嘅洗倉式急跌，但時間唔會長，亦唔會傷及基本面。依家可能似『淡友嘅股災』多啲，唔追貨隨時跑輸大市。」

【君陽證券行行政總裁　鄧聲興】
「嗰年我讀緊中學，唔太了解咩係股災，淨係記得睇新聞嗰陣好震撼，個個都愁眉慘淡，去飲茶時又聽見有玩開股票嘅親戚損失慘重。87股災畀我知道股票市場係周期性嘅，一定會有大浪細浪，不過拉番長嚟睇，個市整體都係上升嘅。至於今年會否再有股災，我就唔覺得會有，因爲企業盈利向上，足以支持恒指繼續升。」

【大中華投資策略研究學會副會長(港股) 李偉傑】
「我大概10歲，或者仲做緊功課。父母可能經歷過當年股災，所以有叫我千祈唔好聽人講就走去買股票，勢估唔到依家我可以解答到大家對股票買賣嘅疑問。以往股災大多突然降臨，災前市況都處於興奮狀態，依家都會未雨綢繆，如早期北韓連番試射導彈，可能與美國擦槍走火，甚至美股創新高，或引發亞洲區走資。若騰訊(00700)、滙控(00005)、友邦保險(01299)及內銀股腳軟，大家就要小心。」

【富昌金融研究部總監　譚朗蔚】
「嗰時我4歲，唔記得嗰時做緊乜，可能讀緊幼兒園。依家睇番，我覺得每次股災都會有啲先兆，例如匯市異動，而依家港股仲係牛氣沖天，經濟、企業業績都對辦，相信恒指明年首季有機會上試30,000點大關。」

【阿仕特朗資本管理投資經理　劉明琪】
「當年我應該仲飲緊奶，或者玩緊，所以完全唔知道發生咩事，父母亦都無炒股，所以對屋企冇影響。雖然市場一直擔心股災將會重臨，不過我就覺得現時風險唔高，同埋股災好似恐襲咁計唔到啦！」