細單位招標發售亂象 必然招徠政府干預

巴士的報

舊年第四季，當時中美貿易戰風頭火勢，影響地產市道，新盤確難以高價去貨。於是乎有發展商想到推廣絕橋，將少量一手住宅物業項目以招標形式發售，惹來很大爭議。

由於招標賣樓欠透明度，無論價錢、買家身份、有沒有回扣，都無人知，形成高價成交的假象，之後發展商以這些「招標成交」的高價為基礎，酌量加點折扣，包裝成筍價，再推盤吸引其他買家。

呢條橋食到太盡，呢種招標賣樓方式亦無監管，近期呢種收樓方式越嚟越普遍,，發展商以擠牙膏形式，連細單位都採取招標形式發售。當然歸根究底，就係佢地睇到土地供應不足，不急於賣樓，並希望慢慢沽，越高價沽出越好！

上得山多終遇虎，搞到官府都關注。運輸及房屋局局長陳帆近日就開口，認為此等銷售方式透明度不足，做法不理想，如發現違規個案，不排除會提出檢控。政府反應遲鈍，慢咗幾個月才發現有問題，不過有反應都好過無反應。

地產建設商會執委會主席梁志堅亦承認，有關做法欠透明度，因此商會反對會員採用招標方式賣細單位，直斥部分會員採取旁門左道方式賣樓，有損行業健康，呼籲會員勿過分採用招標形式賣樓。

堅叔又認為，如果係豪宅單位、特色單位，又或者個別主打中小型單位的樓盤，將貨尾招標出售，都係屬正常，但如今越來越多細單位採招標出售，並非正常出售的方法，是旁門左道的賣樓方式，會整亂個市，呼籲同業重返正軌，採用公布售價方式推售。

其實樓價咁高，發展商應該自律，唔好搞得太誇，否則真係會累街坊。

尚風