金融High Tea——三股硬風吹襲港股

頭條日報

天有不測風雲，本來天文台話掛八號波機會唔大，結果天意難違，最後都要喺昨午轉掛八號波，港股兩點前提早收市。因為外圍同本土風聲都不利，政經大吹硬風，恒指再跌368點，插至今個月低位收市，恒指喺七月累跌764點。

　　昨日開市時段，已有三大硬風吹襲港股，包括中美貿易談判在交易時段，已傳出傾唔掂提早結束；第二股硬風係中國政治局召開會議，稱不以地產作為刺激經濟手段；最後就係政府控告44名示威者暴動罪，反映國務院港澳辦記者會後，政府不再退讓態度相當清晰。

貿談一完人行即出招

　　三股硬風分頭吹襲，雖然美國極大機會宣佈減息，但恒指承接隔晚美股低開215點，之後跌幅擴大，10時後跌勢轉急，曾插445點，低見27701點，創6月18日以來低位，其後跌幅一度收窄至206點。不過，喺天文台掛八號前十幾分鐘，大市跌勢轉急，其中有兩個說法，一個係話因為天文台掛更高風球，為了不想坐盤過夜，於是臨尾離場沽盤增多，推低大市。另一個原因係有傳外媒記者係社媒發文，話美國貿易代表團提前喺12點上機走人，觸發沽盤湧現。最終恒指收報27777點，跌368點；國指收報10675點，跌143點，成交有603億元，以近日標準唔算少。

　　中美貿易談判展開，事前一般估計難有共識，最後美方代表團雖然不是12點已坐飛機走，但會議的確提早結束，中美貿易團於下午1時37分左右，喺上海拍照留念並握手。根據之前時間表，攝影最初安排在下午2時15分左右。會後中方只係話九月份再傾，跟住人行就宣佈增加支持中小企貸款500億元，看來中央都知今次難有成果，準備好一談完就出招。

　　中美貿談無突破提早散場，加上遇到跌市，出口股大挫，申洲國際（2313）急挫4.2%，報108.7元，為恒指及國指表現最差成份股；萬洲國際（288）跌3.6%，報7.71元；跌幅居藍籌股第二位；創科實業（669）跌逾1%，報58.85元。申洲喺成份股跌幅排第一，說明大市受壓主要反映中美硬碰。申洲今年表現神勇，股份一度創出新高，現價市盈率超過30倍，息率只有1.6厘，值博率睇落唔高。

　　貿談有排傾，中央政治局關注經濟形勢，政治局周二開會，其後放出三個重點，穩定物價、就業優先和不將房地產作為短期刺激經濟手段。

　　中央明言不會因經濟下行而鬆綁樓市，內地分析認為，等同第三季各地房市政策鬆綁可能性近乎零，內房股難逃一劫，進取型的融創（1918）收挫3.6%，報35.8元；萬科企業（2202）報29.65元，跌2.2%；中海外（688）報26.9元，跌2.5%；碧桂園（2007）及世茂房地產（813）齊跌1.8%。

社會氣氛緊張影響賣樓

　　內房不振，本地地產股一樣壓力未消，分析師認為本地政治氣氛緊張，經濟受中美貿談僵局影響，樓價好難再升，唯一可取係未來供應有限，加上息口向下，樓價下跌壓力唔算太大。

　　然而從發展商角度睇，樓價只係一個因素，仲要考慮銷售。今年新樓落成仍然多，加上三月份後外貿形勢放緩，六月份後再加埋反修例，現時到了八月，發展商賣樓未必能夠達標。

　　加上當局檢控44個示威者暴動罪，最多可判監10年，喺咁嘅氣氛下，發展商敢唔敢為樓市造勢？仲會唔會有人起哄買樓呢？若然唔係美國減息，恐怕樓價同地產股壓力仲大。

　　收市後吹來另一淡風，政府公佈次季經濟生產總值預先估計數字，第二季經濟按年實質增長0.6%，與首季升幅相同，遜於市場預期的1.6%。本地經濟差到你唔信，恐怕裁員減薪之風轉眼就到。

陸羽仁