香港人已經洗濕左個頭，冇得番轉頭。

https://lihkg.com/thread/1566554/page/1

#1香江之子•8 分鐘前
香港人已經洗濕左個頭，冇得番轉頭。

時至今日，已經抗爭左三個幾月，我諗好多人都好攰，好無力，開始唔知點行落去。所以小弟寫小小野鼓勵各位，希望大家睇完可以繼續爬山。

我地今日所面對嘅，已經唔再係香港政府，或者警察，而係世界上最大嘅恐怖組織。我地嘅五大訴求，係一定抵觸到中共嘅底線，係挑戰緊佢地70年黎嘅統治基礎，所以佢一定會用盡一切方法黎打壓我地。我地係必須要有心理準備場仗係愈黎愈難打，因為我地係打大boss。

但係，我地對抗極權其實係易過前人。單睇2014年嘅烏克蘭革命，佢地係真係靠自己嘅血同命去對抗政府。甚至係任何一場近代革命，都唔會有咁嘅國際關注。反觀我地，我地可以靠文宣，靠fb、Twitter 等去尋求世界各地嘅支持，透過西方民主大國去施壓，同去支援我地。不過請大家記得，我地係唔可以太過依賴外界力量，我地都係要靠自己。因為冇人可以肯定佢地會幫到底，但我地係要抗爭抗到底，即使冇外國聲援。

同時，你同我都係撰寫呢一段嘅歷史。如果你係讀歷史，你應該清楚歷史係冇如果。我成日都感慨如果西安冇事變，國民黨如果冇輸到，今日嘅情況又係點呢？因此希望下一代唔好講:「如果2019嘅贏左，我地係唔係有民主同自由呢？」所以為左我地嘅下一代唔好受苦，唔需要好似我地咁抗爭，我好希望大家要繼續行落下，寫下一段我地贏嘅歷史。

更重要嘅係，我地有數位烈士犧牲左，有千幾位手足被捕，有無數嘅同行者受傷。請大家記得，佢地係因咩事而變成咁，佢地係想香港點？佢同我地都係一樣，只不過佢地行得前過我地，就正如天琦咁。要記得佢地嘅付出唔係白費架，佢地唔係condom。所以我地一定要為佢地爭取埋一份，共同為最後嘅成功而歡呼。

小弟明白，抗爭同生活係要融合。所以小弟每當睇ig嘅時候，會有一種「睇ig仲攰過抗爭」嘅心態。呢個世界的確有好多港豬，生活係平衡時空之中，真係好令人費解，完全唔明白點解可以咁開心咁挽。(自問呢3個月真係冇乜點開心過)但我地要明白裝睡的人叫不醒，有時候睇唔到會比較好。或者另一個角度去諗，就係為自己同下一代去抗爭，而非為班港豬，咁諗可能會舒服小小。

最後，願我地可以除口罩係煲底相見，可以大聲咁唱《願榮光歸香港》，擁抱民主與自由，重建香港。