美國1月CPI升7.5%再創40年新高，亦高於預期，市場估計下月加息半厘機會大增已超過六成，刺激10年期美債息率升破2厘，孳息曲線趨向平坦，美股三大指數下跌，納指更跌逾2%。港股連升兩日，恒指進帳近600點後，今早表現反覆。
恒指低開87點，一度跌191點，見24732半日低位，其後止跌回升33點，見24957半日高位。中午恒指報收24943，升19點；國指半日升30點，中午報收8820；恒科指半日報收5638，跌28點。
藍籌股個別發展，友邦(01299)半日升1.4%，油價再破頂，三桶油上升，中石油(00857)更中海油(00883)半日升逾1%，中石化(00386)半日升0.7%。大笨象(00005)升咗咁耐，抖抖氣都正常，今日靠穩無升跌，不過講真大笨象60元水平阻力大，無咁容易突破到。香港呢邊封到七彩，通通都關，但內地情況好得多，至少可以出街吔飯，唔知係咪因為咁，海底撈(06862)半日升近半成，不過此股積弱已深，彈上嚟咪多手追貨，反而有貨喺手，睇住條100日線(21.26)可能又頂住唔上，好搵位逃生。
內地1月新增貸款達破紀錄近4萬億元人民幣，市場憧憬樓市問題有望鬆綁，內房股進一步走強。整個板塊升幅由超過1%至一成不等，阿Man過年前推介過嘅碧桂園(02007)，今日亦曾高見7元，睇吓條50日線企唔企得穩，企穩下一步當然係吼住條100日線(7.15)，不過要突破都唔容易。除咗內房股之外，物管股亦做好，板塊內股份半日升幅由超過1%至近4%不等。
隔晚納指跌勢較為顯著，港股呢邊嘅科網股亦受壓，ATMXJ無一倖免，但跌幅唔算大，只有網易(09999)跌2%叫多啲啲，其他跌幅普遍少於1%。但生化藥股就跌跌不休，今日整個板塊繼續走弱，龍頭藥明生物(02269)繼續低位插水，半日再跌4.7%，為表再現最差藍籌股。藥明經過兩次被美國佬搞死咗，技術走勢已走晒樣救唔返，加上70元樓上蟹貨多到嚇死人，睇嚟有排唔會有運行。記住跌得多唔係買貨嘅理由，雖然藥明生物累積跌咗成半有多，但暫時似乎未搵到個底，咪多手撈貨博反彈。
麥狄文
(徐狄怡‧證監會持牌人)
沒有留言:
張貼留言