【盤房來料】港股日復日穿底 未有見底訊號勿手多

信報財經新聞

雖然美股上周五反彈，三大指數齊齊彈逾2%，不過中共新一屆中央政治局常委大執位，財金官員應該大換班，市場就用行動嚟表示對前景唔明朗無信心，港股今早一開波就插水。再加上日圓跟人仔繼續走軟，港股之前兩個星期累跌1528點後，今個星期開始又係跌。仲要失守萬六大關，創13年半新低。

恒指低開316點，曾經見過15993半日高位，可惜16000點未能收復，失萬六關係一瀉如注，半日最多跌818點，見15392半日低位，創自2009年4月以嚟新低。恒指中午報收809點，跌15401；國指報收5206，跌310點；恒科指再創成立後新低2888，半日跌206點，報收2894。半日成交額增至814.52億元，由開市跌到半日收市成交增加，當然唔係乜嘢好事。

藍籌股只有6隻逃過一跌，阿Man講過以港股目前咁嘅環境，港交所仲企到喺250元樓上唔多合理，話口未完今日半場跌5.2%，穿埋240元，睇嚟都要向230至235水平推進。友邦(01299)半日急跌7.3%真係無乜幾可，反而大笨象(00005)半日升0.1%，長建(01038)半日升2.6%成為半日表現最佳藍籌股。

即使上周五美股反彈，但當晚中概股表現強差人意，金龍中國指數繼續仆直，今日科網股全線捱沽，騰訊(00700)半日跌逾8%，半日報收213.4元。自從南非股東打晒開口牌要減持，阿Man早料騰訊無運行，但跌到呢啲位都仲未見有資金肯入場撈貨，即係低處未算低。至於阿里(09988)一度跌逾一成，低見62元，半日亦要跌9.8%，仲有貨喺手真係喊都無謂。美團(03690)跟京東(09618)半日分別跌11.4%及10.7%，四大天王之中，呢兩隻一向較為硬淨，今日都出現一成嘅跌幅，希望係大市見底先兆。不過一日未見V型反彈再有大成交配合，港股都仲未識跌停，想買貨都係要忍忍手，即使唔少股份已跌至合理水平，甚至蔗渣價錢。

二十大未見有任何講話或提示如何挽救內房產業，內房跟物管股今日死多兩錢重，龍湖(00960)半日跌11.8%，成為表現最差藍籌股，其他內房股閒閒地跌六七八個巴仙，半日跌一成嘅內房物管股亦比比皆是。除咗內房物管股，今日汽車股跌勢亦較顯著，Tesla宣布下調中國Model 3及Model Y售價，龍頭比亞迪(01211)半日跌近5%，其他汽車股跌5%以上係基本，蔚小理，跌幅由5.8%至11.3%不等。不過長汽(02333)上季勁賺逾八成，股價逆市升3%，成為汽車股中唯一清泉。

唔少人問港股究竟幾時見底，呢個問題阿Man無水晶球自然答唔到，只知道已經唔知講咗幾耐，無成交，無資金入場，港股只有死路一條。藍籌單日跌一成已經成為等閒事，雖然估值已經夠晒低，但日復日穿底，叫資金邊有信心入場，除非嫌錢腥。阿Man提咗好多次，有心想買貨都咪多手，一日未出見底訊號，都係眼看手勿動。

麥狄文
(徐狄怡‧證監會持牌人)