【盤房來料】小心淡友半年結後又發惡

信報財經新聞

美股隔晚三大指數反彈，但美國據報擬對中國實施人工智能(AI)晶片出口限制，令港股未能延續噚日反彈勢頭，今早反覆偏軟，繼續受制20天線(19222)，成交淡薄，半日只有382.29億元。

恒指低開48點，跌幅一度擴大至128點，見19019半日低位，幸而19000大關仲守得住，大市止跌回升，最多倒升74點，見19222剛好喺20天線受阻，大市又再掉頭向下。恒指半日收報19122，跌25點；國指報6498，跌6點；恒科指變化唔大，報收3970，微跌2點。

藍籌股靠大笨象(00005)跟友邦(01299)兩股力托，萬九關先得以保存，港交所(00388)半日跌0.3%，暫時險守300大關。ATMJ只有美團(03690)上升0.5%；騰訊(00700)跟阿里(09988)半日分別跌1.6%及1.8%，阿里就算公布快將分拆，有埋時間表都好，升勢都係曇花一現，暫時喺20天及50天線附近上落，兩線尚未企穩，都咪諗住有咁巴閉上去88元回補裂口。

藍籌嚟講，今日表現較佳係新奧(02688)，半日逆市升近2%；潤電(00836)升1.8%緊隨其後，其他火電股亦造好，主要係延續噚日升勢，仲炒緊動力煤降價呢個消息。

生科股都算樣衰，彈完一日無影，忍唔到手追貨，兩日後又成韭菜，呢啲市真係無得高追。綠葉製藥(02186) 計劃發可轉換債券，發債集資本來就係上市公司為發展而做嘅平常事，咁樣都要插水近一成，可見市場氣氛有幾唔理想，投資者信心有幾脆弱。其他生科股亦陪跌，藥明生物(02269)半日跌3.3%，同系藥明康德(02359)亦跌1.6%；其他生科股閒閒地跌3%以上，中生製藥(01177)半日跌3.4%，藍籌之中跑第尾。

除咗內地火電股，今日公用股亦逆市向上，傳統呢個板塊上升，就係個市無運行，雖然恒指目前仍守於萬九關之上，但一條移動平均線都未能收復，唔排除做埋個期指結算跟半年結，淡友就會出招。早於上周阿Man都表示由18000展開嘅反彈浪，至20000水平附近一直未能重返100天線企穩，本輪反彈浪或就此結束，已提醒有貨喺手嘅缸邊友，好趁二萬水平減吓貨，否則又係得個坐字。

麥狄文
(徐狄怡‧證監會持牌人)