港股上周五因黑雨休市，雖然期間美股都反彈，但內地股市跟金龍指數腳軟，黑期跟ADR早已跌穿萬八大關。人民幣離岸價更急跌至接近歷史低位，不過中午見有反彈，重返7.3水平附近，否則港股跌勢或更凌厲。恒指低開260點，開市即失守萬八關，雖然一度收窄跌幅，見17976半日高位後跌幅擴大，半日最多跌359點，見17842半日低位，中午跌305點，收報17896；國指跌89點，報6225；科指跌80點，報4011。大市半日成交606.68億元，以跌市嚟講，半日成交反映沽壓都唔少。
金融股全線向下，友邦(01299)半日4.1%；港交所(00388)所失守300元，跌3.1%；招商銀行(03968)半日跌2%；中國平安(02318)跌1%；工商銀行(01398)跌0.8%；大笨象(00005)跌0.6%；建行(00939)最本事無起跌，呢批金融股合共拖低恒指112點。
不過講到跌勢顯著應該係本地地產股，滙控上調新造按揭息率，對本來疲弱嘅本地樓市嚟講係踩多一腳，加上誠哥又再劈價推貨尾單位，市場憂慮或掀本地地主佬賣樓減價戰，本地地主佬捱沽。新地(00016)仲要交出一份唔多理想嘅成績表，半日股價跌近一成，係表現最差藍籌股。新世界(00017)半日跌5.4%；雖然誠哥賣樓賣得快，好世界，但股價半日亦跌近2%。內房跟物管股上周係威係勢反彈，不過阿Man講咗，賣唔賣到樓先係減債關鍵，暫時就算阿爺出咗咁多招刺激樓市，但內地樓市未見起色，內房股激情過後都要面對現實，股價掉頭回落亦係預料之內。
科網股全線向下，華為新手機大賣，小米(01810)手機業務再面對挑戰，股價半日跌4.5%；至於阿里(09988)除咗暫擱置盒馬上市計劃，人事亦出現變動，股價半日跌3.6%。攜程(09961)業績跌唔停，半日再跌2.7%未止跌。京東(09618)跟百度(09888)半日分別跌3.9%及2.2%；美團(03690)跟騰訊(00700)分別跌0.9%及0.2%，算跌得少。呢批科網股加埋又拖低恒指103點。
醫藥股又無厘頭趁跌市反彈，逆市上升，香港上市生物科技指數急升3.3%。國藥控股(01099)入咗藍籌後，今日表現好，升4%；中國生物製藥(01177)升3.4%；翰森製藥(03692)半日升3.3%，係表現最佳幾隻藍籌；石藥集團(01093)升1.4%；藥明生物(02269)升1.2%；阿里健康(00241)及京東健康(02618)分別升0.9%及0.5%。
人民幣跌至接近歷史低位後反彈，內地股市做好，大市於17800暫見支持，即市或反彈至18200點，不過大市上周失守多條移動平均線後，20日線即日線保力加中軸(18280)跟10日線(18336)阻力更大，短線若未能重返呢兩條平圴線之上，後市都係繼續向下尋底。
麥狄文
(徐狄怡‧證監會持牌人)
沒有留言:
張貼留言