MaBelle 老細吋得起 摸頂賣豪宅 再押注黃金

hk.finance.yahoo.com

本地老牌家族，往往能準繩捕捉到香港地產市道週期。好似97年，傅老榕家族一鋪賣咗中環富麗華（Furama）酒店予林建岳的麗展（0488.HK），呢單刁真係講足近30年。

今鋪能在疫後地產低潮殺到前，摸頂甩手豪宅的，亦屬於老牌潮洲幫、珠寶品牌MaBelle 創辦人馬墉傑家族。識佢嘅人都話佢吋，但又真係吋得起。

未通關前 36億沽出深水灣豪宅

2022年底，仍未正式通關之際，樓市仍呈現一片只升不跌的假象。由馬氏三兄弟持有的深水灣道66號六座排屋，以36億元放售予霸菱私募基金創辦人莊佳誠（Jean Salata），呎價$21.88萬，現正申請重建，當時隨著香港地產下滑兼息口高企，市場人士還估計交易會告吹。這宗交易，成為富豪飯局茶餘飯後的佳話，又妒忌又羨慕也，還說馬墉傑（Max Ma） 「係有啲斤兩」。

原本六幢排屋由馬氏三兄弟馬燦銳、馬墉傑及馬墉宜三兄弟各持兩幢，他們都篤信風水玄學，細佬馬墉宜（Lawrence Ma）更跟隨過紫微楊學紫微斗數，相信南區地產的佈局與九運的「南山北水」剛好相反，所以肯把自住的大屋割愛。據知他們現租住淺水灣的服務式住宅。此風水大宅三十多年為他們賺咗住之外，更一次過套現$36億，每人分得$12億，認真和味。但這還不特止，聽聞對珠寶市道在行的二佬馬墉傑，將賣屋套現資金押注買黃金，佢老哥如果揸到今日，又大升1.5倍了，所以佢身邊嘅友人對他不得不「服燒賣」。

兄弟動向係豪宅觸底信號？

馬氏家族係本港嘅老牌潮洲幫，屹立香港70多年，見過香港地產多個週期。父親馬興秋1949年已創立利興鑽石集團，與同屬潮洲的陳智思家族、大生地產嘅馬清偉家族都係世交，佢哋嘅母親早年都係麻雀腳。馬家早年在泰國做鑽石珠寶生意，最出名由緬甸入口紅寶石到泰國，聽聞泰國的軍頭都幫趁利興買寶石，馬家在泰國人脈非常之廣。所以當年馬墉宜的岳父李福兆出獄後，亦選擇移居泰國曼谷長住，有所照應。

除了MaBelle，馬氏亦有另一高檔珠寶牌子 Marbros，意謂馬氏兄弟，佢哋三兄弟都可以講係兄弟同心，其利斷金，「利興」個招牌屹立香港七十多年仍得以傳承。而近排馬氏兄弟又開始留意香港嘅地產，如他們出手掃貨，可能就是香港豪宅見底回升的信號了。