金管局出車 市民碎銀換紙幣

蘋果日報

金管局將於明年夏季推出一項相當有用嘅措施，就係安排流動車遊走港九新界收集十蚊或以下硬幣，市民可將硬幣換番紙幣或增值落八達通。

可增值八達通

近年唔少商戶為免拎一大堆銀仔去銀行入錢，被銀行收手續費，索性唔收毫子，加上依家搭車、買嘢多數用八達通，唔知大家會唔會同華華一樣，喺屋企儲埋儲埋一桶桶毫子，一直唔知點處理呢？
金管局總裁陳德霖可能有相同煩惱，於是度到呢條好橋。金管局明年夏天開始，就會利用大型貨車改裝成流動服務站，按時間表喺港九、新界指定地點，包括屋苑同領匯（823）旗下商場停泊，同市民換硬幣。
金管局會將收回嘅硬幣撥歸庫存，市場有需求就放出去，循環流通。截至舊年底，硬幣流通總值達到63億元，較五年前增加19%，當中以5蚊銀佔最多，有19億元，其次係2蚊，有15億元，10蚊有12億元。