魚缸通：散戶估A股入摩 買定國壽平保

on.cc東網專訊

上個禮拜港股好頹，累跌403點。A股能否入摩周三凌晨將會揭盅，唔少投資者都幾樂觀，今早個市好似提番起勁，恒指升逾200點，散戶有無吼實啲中資股？

致富證券大埔分行經理Gordon話，今朝有唔少散戶買大，入咗中國人壽(02628)及中國平安(02318)，博A股成功入摩，帶動股份炒上。散戶打算揸到禮拜三，但Gordon話，最好有得食就食住先，以免夜長夢多。

Gordon仲話，有散戶今朝入咗啲細價股同新股，例如福澤集團(08108)、信越控股(06038)及尚捷集團(08183)。福澤集團上周五離奇急瀉85%並停牌，公司話主席李革因個人原因出售約1.13億股，今早復牌曾彈22%，引到唔少散戶追入。