移居台灣三個月遇制水及地震 董敏莉直擊疫情生活停電最唔慣

頭條日報

台灣疫情變得嚴峻，今年2月同律師老公莊耀金，帶着兩歲囡囡Martha移居高雄的董敏莉（Monie）報平安，她表示全台灣都升到第3級警戒區，要遵守限聚令及保持社交距離等。抵台3個月，她先後試過大停電、制水及地震，在香港生活40年從來未經歷過的事一次過經歷晒。採訪：方騫平

居於高雄鼓山區嘅董敏莉透露高雄疫情不及台北及新北咁嚴重，但大家都少咗外出，她說：「目前出外要戴口罩，去商場、停車場都要量體溫、消毒及實名登記等，市面人流少咗，公共設施如游泳池、遊樂場、商場兒童天地等都暫停開放，但Food Court、餐廳都有開，而每個座位有膠板相隔。超市嘅日用品、糧食及蔬果存量算OK，都唔使去盲搶。」

學識放水喺枱底

始終家有小朋友，所以Monie都要出外買新鮮餸菜，「最近我分別走訪過兩間附近嘅超市，見到超市菜架嘅菜都畀人買晒，好彩仲有鮮肉、水果，都夠食幾日。至於另一間大型超市嘅牛奶就俾人掃清，而廁紙就貨源充足。」上周因為供電能力不足，臨時宣佈要執行緊急分區輪流停電，她的寓所由下午3點幾到晚上8點幾分3次停電，每次大概一小時：「最唔適應夜晚食食吓飯成屋黑晒，有少少唔知點處理，最慘大廈嘅後備電掣未搞好。下次宣佈停電時，要馬上將電話及電腦充電，然後去沖涼，因為停電後實在太熱。」另外，兩公婆有晚試過暈一暈，原來遇上地震都唔知，「聽返鄰居講，遇上咁嘅狀況要帶埋電話同水樽，然後匿喺枱底。」有過經驗，Monie學識要放幾支水喺枱底，遇地震時能夠自救。