本周被喻為「央行超級周」，除美國聯儲局外，仲有英、日及瑞士銀行等多間主要央行議息，投資者入市趨審慎，昨晚美股好淡爭持，靜侍聯儲局議息，道指升6點，標指跟納指分別升3點及2點。美股目前仍然喺高位整固，待市場對第四季息口走勢再作判斷，加上聯儲局或要到明年中先有望開始減息，喺美股估值又唔算便宜之際，基金亦唔急於追貨。至於港股噚日跌穿萬八後，今日好淡爭持，波幅只有149點，暫時受制萬八大關。
恒指高開11點，一度跌98點，見17832半日低位，創近月新低後止跌回穩，最多升50點，見17981半日高位，但萬八關未能收復，中午升幅收窄至只有3點，恒指收報17933。國指半日升1點，報6210；恒科指跌21點，收3966。半日成交額只有409.08億元，愈玩愈縮。
今日港股得以擋得住唔插水，全靠內銀股，除咗招行(03968)僅升0.4%，其他國有銀行股，普遍升1%或以上。不過唔係全部金融股都升，平保(02318)半日跌0.1%；大笨象(00005)、友邦(01299)跟港交所(00388)半日齊跌0.5%。科網股今日腳軟，除咗阿里(09988)半日升0.4%，其他藍籌科網股全線向下，京東(09168)再創上市以嚟低位，跌3%；騰訊(00700)跟百度(09888)連跌六日，分別再跌0.6%及1.4%。美團(03690)跌1.6%；小米(01810)、攜程(09961)亦跌少過1%。其他藍籌以新奧能源(02688)升逾半成表現最好，海底撈(06862)半日跌2.6%表現最差。
電動車股今日腳軟，理想汽車(02015)再被王興減持，半日跌2%；蔚來(09866)發債集資，跌3.5%。不過小鵬(09868)升0.3%唔跟大隊，而比亞迪(01211)則跌0.8%。波羅的海乾散貨指數(BDI)連升九日，航運股又造好，對指數最敏感的太平洋航運(02343)，漲2.5%；其他航運股升幅由1%至3%不等。
港股呢幾日成交都不足千億元，噚日成交額只有800幾億，成交低迷情況持續。港府早前成立專責小組，就本港股市流通性開會，不過唔知開咗幾多個會，但一直未見任何措施出台，司長都忙於大搞夜經濟，但日經濟重要命脈股市就不聞不問，估計要等10月份特首嘅《施政報告》先會有公布，睇嚟呢個9月港股都唔會有乜嘢突破，繼續易跌難升。即管睇睇人哋央行議息，會否放一放鴿，畀個藉口港股反彈，否則受制萬八關，若再失守短線支持17800的話，將會再試前底17500尋找支持。
麥狄文
(徐狄怡‧證監會持牌人)
沒有留言:
張貼留言