魚缸通：索羅斯起金旋風

money18.on.cc

A股續休市，港股端午節假後trade一日又到周末周日，搞到魚缸散戶今朝都只係小注怡情，主力短炒金股同細價股。

致富證券荃灣分行經理Ray話，可能因為散戶睇到報道話「國際大鱷」索羅斯復出沽股買金，今朝都跟風買吓啲金股，好似招金礦業(01818)、紫金礦業(02899)等等，反而較跟足金價走勢既SPDR金ETF(02840)，散戶就覺得「太大價」冇買到。今朝金股普遍逆市造好，特別係招金一度急升3%，相當強勢。

雖然今朝投資氣氛淡靜，但Ray補充，一啲細價股同半新股都有散戶小注炒即日鮮，好似近日曾跳崖式急挫既焯陞企業(01341)、以及上市冇耐既川控股(01420)，部分散戶見佢哋企穩後甚至有升勢，都小注約2至3萬元短炒博賺返啲茶錢。

另外，致富證券九龍城分行經理William話，好多散戶都冇估到恒指可以升穿21,000點，所以喺20,800-20,900點已經開始沽貨，主要沽出早排買入嘅內銀同深港通概念股，賺幅有約10%，依家已經冇咩貨咁滯。佢又話，散戶普遍都等緊大市進一步回落，初步睇吓會唔會穿21,000點;回調夠深會趁機吸納內銀股，主要貪佢哋估值低。