2020年8月11日 星期二

媽媽金銀指數

記錄下先 :

黃金 500/600 - 媽媽飛身賣金飾 (2006年)
黃金 900/1000 - 又一批媽媽賣金飾 (2008年)
黃金 1200/1280 - 就連爸爸都沽金幣 (2010年)
黃金 1600/1700 - 媽媽開始排隊買金粒和銀條, 金價俾推上 1920, 銀價接近 50 (2011年)

之後金銀價向下跌, 大眾都收手, 只有一班死士繼續買平貨, 愈跌愈買 ! 金價低位 1500, 銀價低位 26 (2011年-2012年)

現2012年9月2日, 見到網上愈來愈多人加入金銀甲行列, 但好多媽媽唔知金銀去邊買, 唔識分 99/999/9999 金, 所以金銀離爆煲還好遠好遠 !

今日2013年2月22日, 好多新入加入金銀甲, 約多咗 50%, 但還是好多媽媽唔知實金去邊度買, 唔知紙金和實金的分別, 唔知買99/999 還是買 9999 好 ?
金價升過去 1700之上遇阻力, 衝幾次都企唔穩 1700之上之後向下行, 2013年2月20日見 1554 最低位後反彈中, 金市真正的走入牛二階段 !

今日2013年4月16日, 金銀市場在4月12日晚俾人大洗倉, 而昨晚最低見過金1347/銀22.63 ! 呢兩日好多人週圍搵實貨買, 而好多人都買唔到低溢價的金銀貨品 ! 金銀市場下跌, 但實貨市場熱爆, 而本人網誌已打入top100之內有少少驚 ! 不過手上實金實銀當收藏就是啦 !
剛剛NOW財經台投票, 最多人認為金市已轉入熊市, 所以唔似是牛三 !
最終金價跌到1180, 而銀價去過18, 而本人網頁跌去200位 !

2013年9月4日
金價今日在1405美元, 飾金賣俾金舖價HK$13430

媽媽心聲:
媽媽(1): 我上年年尾結婚收到成八両金,好後悔當時無放緊啲,嗰時啲金18xxx, 唔知要等到幾時!
媽媽(2): 要升上$18000以上有D難. 我打算$17XXX以上都放D

所以好多媽媽會在金市走入牛三前, 沽掉手上實金 !

2014年8月9日
金價在1180至1380行走, 網上愈來愈少人講金講銀, 反而講股市的就愈來愈多, 好多人以為發現新大陸, 可以借平息錢買高息股收息, 可以賺息差高速去到一千萬財務自由, 當以前的人是蠢才, 唔識呢個財路 ! 為何1987年股災多人自殺 ? 就是因為借貸, 有人還穿櫃筒用公司錢買股, 以為賺到可以填數, 所以輸咗不可不死 ! 以後個幾個股災因為已得到教訓, 股民最多借孖展俾人及時斬倉, 唔曬輸到要自殺 !
講返金銀, 其實呢段時期, 可以慢慢買心意金銀幣, 因為少人同你爭, 唔怕缺貨而價格又低 !

2015年4月24日
真係好耐無 update 啦, 而時間過得好快 !
金價在1140至1300行走, 而依家在1200位徘徊, 所以本人繼續慢慢儲靚金銀幣 ! 銀價現在15.8, 算是好低位, 所以好多銀幣是平過以前 !
呢個4月最大新聞是股市突然走入牛三, 大眾已衝入股市玩大細, 但金銀市就似行緊熊三, 因為差不多無人再講金銀, 所以依家最平還是實金實銀,  而樓市個別細單位還是愈賣愈高價 !

2015年9月14日
今日金價1105, 銀價14.40, 金銀繼續尋底 !
股市由牛三在7月跌去熊一, 炒股的人又打回原形, 也有人要輸突, 但媽媽和爸爸還是忙於講股, 在媽媽網前5頁都無人說金, 只有人說人民幣和股市 !
但在年青人的討論區突然熱鬧起來, 呢個9月, 好似好多人中咗邪, 幾個網上金銀店都俾人掃光平價銀幣、銀章、銀條; 網店做到氣咳, 買銀無貨要預訂 !
好多人是第一次買金銀幣/條的, 一個新升浪的開始 ?
樓就愈起愈多, 搶住入市的人開始收手 !

2015年12月5日
金價在見完1046低位後(銀價13.83)昨晚, 因為預計美國會加息, 突然上升至1086(銀價14.54), 好耐無見過咁強的升勢 ! 是否金銀價已轉勢, 還須觀望 !
本人在金銀價由高位跌落來, 在呢4年中慢慢增加了一倍貨, 當年幾驚個價一去不回, 而手中唔多夠貨心都慌, 所以依家已有多些貨等升值 ! 也有一些收藏幣本身價格升值咗, 不過想賣都要等金銀價升上去先, 在呢個低位唔值得賣出 !  有些靚收藏幣就會留俾仔女 !

2016年5月2日
睇來金銀價在牛二調整己見到底位, 而呢刻金價衝緊1300位(銀價17.90), 就係另一個升浪己展開 ! 
在網上也己見唔到有人叫你唔好買黃金了, 而也多咗專家叫人買入黃金 !
媽媽網就好靜, 因為有位反對人買黃金的[專家]在坐鎮, 成日叫人唔好買黃金 ! 所以如果媽媽網講黃金的人熱鬧起來, 會是在牛三初期 !

2016年7月7日
金銀價總於衝高位, 金價最高1375, 銀價最高21.136 ! 如果金價企穩1300之上和銀價企穩20, 金銀價可以再升 !
但媽媽第一個反應是: [可以沽金了嗎 ?], 所以牛三沒出現 !

2017 年7月27日
哇又過咗一年, 今日金價1264美元、銀價 16.73美元 ! 金銀價跌過去低位又升返上來 ! 
媽媽網已無乜人想買金銀, 只想賣金 !
網絡上都有人等唔耐煩, 出來鬧人教人買實金實銀, 說樓市才是賺錢工具, 可見樓價已到瘋癲, 而金銀價已到谷底 !

股市過去也是一個悶字, 呢幾日才轉勢, 睇來李居明預測8月起2018年到2019年都利好股市是正確 !
好多人之前賺唔到錢 ! 好多媽媽由人民幣轉去港幣收息 !
而有些媽媽走去學人炒債玩一個佢地認為是低風險遊戲, 在一個息率上升的環境下, 情況使人擔心 !


2017年11月5日
金價1269美元, 銀價16.80美元, 上上落落, 無乜進展 !
媽媽網要去到第7頁才有人說金, 市場真係去到谷底, 熊三階段 !
樓市在高位橫行, 收租的人照收租, 2017年都算是豐賺的一年 !
股市就如李居明預測的, 8月後轉旺, 好多人轉去炒股, 愈來愈多新人加入炒賣 ! 財經綱主有唔少人已去到超過一千萬凈資產的財務自由目標, 市場滿是歡呼聲 !
債市因為可以做低息槓桿, 也吸咗唔少人入去参於 !
比特幣市場狂炒, 驚死的人都係唔好掂 !
在市場興奮之時, 說乜都無人會聽入耳, 所以睇戲好過 !

2019年2月18日
話咁快就過咗一年零兩個月 !
唔係網友孻姑提, 本人都唔記得記錄了 !

在媽媽網都已無人問買金, 只間中有人想賣金, 可能已到熊三底 !
本來跟據Martin Amstrong 的預測, 金價會由2015年10月升到2020年1月18日才轉走勢, 但呢4年金價升下又跌下, 而2018年升去1360又跌去1160, 悶到嘔, 但本人跌又買, 升又買新出收藏金幣 ! 今日金價終於企返1324 !
今年因為本人須買多層自住樓, 所以如果唔想借銀行錢, 就要沽出除人民幣外, 還要沽出一些實金, 唔係儲唔夠錢, 因為樓價實在太貴了 !
見到金價升是太興奮啦, 因為李居明預測金屬在豬年無力升 !
在1295、1302、1319本人已開始慢慢沽出在7800-9000蚊1両買入的1両金粒, 因為實金有樣野麻煩是唔想帶太多現金在街上行, 所以唔可以一次過大量沽出 !

有人說唔會估市, 因為無得估, 但本人就是要估, 因為無前景就無咗計劃, 最好來緊金價繼續升而樓價下跌 !

2020年4月15日
又過了一年零兩個月, 今晚金價升過去1747美元, 太癲了 ! 銀價就還停留在15.72美元, 但有專家說, 銀價會跟在金價後面走, 也將來可以升幅高過金價 !
本人已在2019年上半年沽出了20両金粒(賺到約10萬蚊), 本來想愈升愈沽再沽多20-30両實金出去為了買樓, 但因為在6月起黑衣人在搞搞震, 所以放棄了在香港買多層自住樓, 好運保住了個些實金 !
見到有多個收藏家也在1600-1700美元沽出了十多年的藏金換入股票, 不知是否個好轉換, 要以後幾年先會知 ! 但本人就唔會做呢樣野 !
也有個怪現像, 金銀價愈升, 但回收價就愈來愈低 !
有專家解釋, 是因為肺炎金銀礦停工, 鑄幣廠停工, 而交通好多都停了, 所以幣商無新實貨到, 實金實銀俾人炒高咗, 就係賣價貴咗, 不過因為回收商好多也停咗工, 所以無加到回收價, 而有D幣商還減咗回收價添, 因為可能無現金買返, 也唔想開高價來俾人一窩蜂走去賣貨, 因為價格波動的太利害, 所以想賣到好價, 要等到肺炎過後, 價格正常返 !
李居明預測, 明年八白財星會飛去西方, 會利好黃金, 所以大家要珍借手上的實金實銀 !

2020年7月27日
只是過了三個月, 今早金價一野升穿2011年的高位1920美元, 最高去到1944美元 !
是否要雙頂回落就不知了, 也有可能一路挾上去挾死些淡倉 !

銀價就升去24美元之上, 但就一年來計升咗36% , 而金價一年來計只升咗27% !

2020年8月9日
金價在1980美元上落了一排, 之後只用了幾日時間升上去2000美元之上, 最高見過2074美元, 而銀價最高去過29.845美元! 睇來金銀價已走入牛二階段, 遠遠沒去到牛三, 因為網上不如2010至2012年熱鬧, 也不見有新人開個金銀網誌, 如股市旺時, 講股網誌多如春筍, 之後好多都死咗, 因為佢地都賺唔到大錢!
星期五最大的新聞是, 有人見到利昌門口排了個長龍等開門買金銀, 因為好多銀行根本都無實金賣了, 所以大家要好好珍惜手上的實金實銀, 因為沽了出去, 可能買唔返, 而買賣差價都高咗好多, 你無可能用實金實銀去短炒 !
記住, 李居明預測, 明年八白財星會飛去西方, 利金價 !



以上只是從網上得到的訊息, 會繼續記錄下去 !


牛一階段因為經過上一個大跌浪, 無人睇好, 還會見升就去沽 !
牛二階段因為見到前人已賺到錢, 所以會多人加入, 但還有好多人唔信升勢, 會叫你小心見頂 !
牛三階段大眾已瘋狂, 只知實賺唔會輸, 會通街叫人買, 個個都是專家 !

90 則留言:

匿名 提到...

Lisa,其實我一早已經發覺,以前條頸掛滿金鎖鍊的男人,現在已經消失在人群中...
因為早前已經套現了XDD

nlpsonia

Lisa 提到...

回nlpsonia,
人的心態, 個個賣咗後等價跌 !

honson 提到...

這個指標好呀!有啓示。

匿名 提到...

黃金 3200/3280 - ...#☆※#$△!...

...媽媽聲!因為已斷曬貨!

旁邊學

Lisa 提到...

回旁邊學,
睇下會唔會恐慌性買貨 XDDD !

匿名 提到...

其實上次我去利昌買金時都已經見到一個呀婆with 呀伯買金la

ANN

Lisa 提到...

回ANN,
最關鍵是否多人講金和買金, 就如Joe的文章說, 到時D人唔理正業而留連在報價機前 ! 如果妳去買餸, 而街市婆同妳講, 今日金又升好多呀, 妳就要小心啦 XDDD !

匿名 提到...

我有朋友都開始留意金價, 仲話可能要買番d!

ANN

匿名 提到...

那到呢個時候, 是否需要賣金呢?

Lisa 提到...

俾唔到建議你, 自己去決定 !
先知風險才玩遊戲 !
Jim Sinclair 說金價升去1764是轉入牛三階段, 而牛三頭入市還是可以賺到錢的, 但到了牛三尾就要小心啦 !
牛三尾係邊 ? 可以2000, 3000, 5000 ? 天知地知, 你我唔知 !

匿名 提到...

Lisa 姐,如果再有QE4,到時可能會有機會牛四噃...


旁邊學

Lisa 提到...

回旁邊學,
唔曬估, 等睇戲吧 :)

匿名 提到...

報價, 利昌:
8/8 9:05am $15,900/tael (9999)
$393/tael (但付錢後旋即變$395/tael)
今早9:05 沒有其他客人

Lisa 提到...

謝報價 :)

gogoldjoe 提到...

股巿真係好差,好多人蝕錢,近期有三個親戚都係心灰意冷下,轉投黃金。

Lisa 提到...

回Joe,
我見到你大掃金幣 XD !
慢慢會愈來愈多人買實金實銀, 推金銀市去牛市第三期, 而依家我地還在牛市第二期開頭吧了 :)

rl 提到...

如果各國政府都不斷加印銀紙,金銀一定升!

Lisa 提到...

回rl,
政府唔印銀紙又可以做乜呢 ?
叫人民交多 D 稅, 又俾人媽到飛起, 而錢又唔係樹上生出來的 XD !
債終於有日要還 !

Macy 提到...

Macy有一疑問 ? 香港金管局推出2012年 5元 和 2012年 2元 新硬幣是否相等於"量化"印銀紙呢 ?

Lisa 提到...

回Macy,

我估唔係哇, 只是補流失的硬幣 ?
印銀紙是發債, 如 ibond ?
或借多 D 錢俾銀行 ?

Macy 提到...

回Lisa姐,

多謝Lisa姐回覆,因為之前三間發鈔銀行先後已經出左新版銀紙,加上對上一次出硬幣應該係1998年,近日美國量化是否推出第三期(QE3)熱烘烘,所以Macy才有此疑問罷!!^^

嘉芙蓮 提到...

呢兩日去買金果D人都係一留買開既叔叔嬸嬸,尋日排緊隊同個叔叔傾計,佢話佢呀媽打仗時都係靠攞住三十幾兩金走難,而家剩落好多比佢,所以佢係黃金死士,尋日仲攞住成袋錢嚟買金條。不過未見有咩新手,大陸同胞就有好多啦。

CK 提到...

好多媽媽比較喜歡去上商買金粒, 可以一兩一兩買;)

Lisa 提到...

回嘉芙蓮, CK,

新人年輕人多, 而多數是買實銀 :)

Unknown 提到...

今天小朋友生日,出開中環,中銀沒有金熊貓,就恆生買左袋鼠金幣補數。連同昨天的金熊貓,送給小朋友留念。好在近期金價回了的的。

Unknown 提到...

我覺得買金最實際,攪生日會又浮跨,現金利是有貶值。

Lisa 提到...

kelvin 小孩生日禮物好重手啊 :)
我只送銀幣 XD !

Unknown 提到...

這幾天很多人買金,不知是否個個人看完Lisa姐個blog,受感染呢?

Unknown 提到...

得兩個小朋友,金額不算太大,留低既,都係一番心意,而唔系負擔,對白很熟呢。哈哈哈哈。

Lisa 提到...

回kelvin,

一定係, 因為一說到細金幣有收藏價值就全線無曬貨 XDD !

嘉芙蓮 提到...

尋日冇晒一安士風葉,我都買咗本安、有咩事買嘢唔使打散麻...hahaha

Lisa 提到...

回嘉芙蓮,

半安唔夠細呀, 1/10安就差不多 :)

Unknown 提到...

回樓上關於香港硬幣資料

香港的硬幣並非法定貨幣!!!

節錄wiki「香港硬幣作為輔幣,其發行是方便市民作找贖用途,沒有外匯儲備支持,不是法定貨幣,在國際上亦不能作貨幣兌換。流通硬幣如果不再使用,它便沒有法定價值。由於沒有「憑硬幣即付」的承諾,硬幣也沒有編號的需要。由於不需要發行準備,香港硬幣不能由商業銀行鑄造產生。」

Lisa 提到...

謝 Brian 的解釋 :)

嘉芙蓮 提到...

全日開會,好想飛去入貨!偷偷check yr blog only!

Lisa 提到...

回嘉芙蓮,
跌市大家都驚無貨賣 XD !

honson 提到...

當下一轉上返US1600樓上,

一定大把人趕住去放貨....

Lisa 提到...

回honson,
通常, 99%人都賺唔到錢的 :)

嘉芙蓮 提到...

呢個局勢,都係趕去入貨了!

Lisa 提到...

回嘉芙蓮,
其實金價在1600樓下是買得過的, 不過現價來說, 新出澳洲馬年金幣, 溢價好高, 高過一些舊年份生肖金幣, 所以我沒買, 只買咗2014馬年銀幣 !

平行宇宙 提到...

(09/08/2014)所以现阶段是属于牛2前阶段。

Lisa 提到...

回xiao neni,

可能係:)

肥姑姑 提到...

Lisa姐,幾時得閒再update媽媽金銀指數呀?呢輪好似好靜

Lisa 提到...

回肥姑,

金銀市是行緊熊三, 因為好少人在講金和銀 :)

旁邊學 提到...

Lisa姐,今舖全球一齊將個印刷泡泡吹到前所未見嘅超大,如果有乜依陏,㑹唔會有可能不經傳統之一二三階段,即時進入全球性超級瘋牛狀態架呢?...

Lisa 提到...

回旁邊學,

來緊會發生乜事無人會預知, 而李居明預測7月至10股災, Martin Amstrong 預計10月15日後歐美爆煲, kingworld news 有人預測世界金融要 reset !
好彩李居明說, 11月起全世界轉美好前景, 所以只要唔參與瘋狂遊戲輸大錢, 一定過到難關 :)

猛虎勇士 提到...

唔只李居明,我睇過好幾本運程書都說呢段時間最危,因為大家都係用流年流月五行同飛星算,當然相同!現在確係收集平價銀幣好時機,可惜收藏幣跌得小!
以我靚仔時候,大陸個種炒郵票既瘋狂行為現象,等班大陸大炒家係股市賺完錢後,未來幾年應該開始炒大陸金銀幣,尤其個類十萬產量內既特色金銀幣,因為太少產量那些不是一般市民玩得起,糖水滾糖魚冇肉食,一定要有大量人參與先有肉食,例如大媽等。我估應該係中國公開黃金儲備時候就開始。

Lisa 提到...

係呀, 金銀幣有日都同今日股市一樣癲的, 所以儲幣好過一頭樁入股市 !

Unknown 提到...

Lisa 姐/各位有无听过犹太人每逢7年的禧年(Shemitah Year)及第四个Blood Moon 日期? 两者都系今年九月!

Lisa 提到...

大家小心D就是啦 :)

猛虎勇士 提到...

開始炒瘋了,呢個星期,好旺角多間店貼出高價收香港郵票,一刀刀收,好耐冇見過郵市呢個場面,有些近十多年生肖小型張,平均收到1200一張!
唔知上面又吹乜野風。

Lisa 提到...

係呀?
我星期四剛去過, 想睇下匯豐銀行150年鈔收幾錢, 但沒有價貼出 !

猛虎勇士 提到...

真的,好熱鬧,你再去時記得問下一樓老闆娘究竟發生乜事!行家話郵品市突然咸魚翻生,笑死!

猛虎勇士 提到...

http://www.discuss.com.hk/viewthread.php?tid=24604555&extra=page%3D1&page=1

Lisa 提到...

基本法25年兩日就賣曬, 去得好快, 我都抓曬頭, 原來炒風來到 !
個郵局我唔喜歡無買 !

Lisa 提到...

老公買咗好多97年首日封, 去好旺角問過收幾錢, 個老闆娘說是垃圾 XDDD !

猛虎勇士 提到...

首日封好少有高價值錢的,通常要好有記念價值又或乜乜名人用過先得。上面炒郵多數玩原相和新品質相。現在佢地多數高價收整版,單隻唔高收或唔收,除非係極品。

照咁睇,只要中國公布黃金儲備,就好快炒到金銀幣!
上個月見一樓有隻單銀鵝眉山賣1880,心思思想買,但又怕假,因為唔貴,點知早排就加到2600!
上三樓問都話冇單銀貨,要留,價都要賣2380-2450。
我抽曬今次長城貨,睇下有冇得中,抽幾年都未中過。
我舊年轉大運入財運十年,希望搵多些養老金!

Lisa 提到...

我都唔識玩郵票, 成日企係度唔知點落手, 所以好多時只買單隻俾仔女 !

羊年我兩隻都中, 下星期出去取貨 !

Satan_Wong 提到...

呵呵~很多東西也便宜了,尤其我最想買的碗筷~~

Lisa 提到...

買咗沒? 睇來金銀市好快會炒起 !

sinsin 提到...

請問點抽生肖幣,點解我唔見長城通知抽幣嘅?

Lisa 提到...

回sinsin,

去長城網頁登記, 之後如有新幣出, 會有電郵俾你 !

Jackcal 提到...

之前跌係因為加息,現在升又係加息,原因係?

Lisa 提到...

依家美債已是天文數字, 中國都在減持中, 而一加息, 舊美債值會下跌, 因為新債的息會上升, 所以投資美債的人會互相爭住減持, 由美債free出來的資金會流去美股和金銀, 就如 Martin Amstrong 預計的, 不過佢近來沒睇好金價, 要金價升去1225佢才會確定金價的升勢 !

Jackcal 提到...

原來如此,好謝提點。

Jackcal 提到...

若是本月宣佈加息,你估金銀會是跌定升?

Lisa 提到...

黃金價一講到加息就跌, 已跌咗4年, 所以如果落實加息, 就可能會升, 而你都見到昨晚的升勢 !
不過聰明的人不會賭單邊, 一定要留筆錢防身 !

Jackcal 提到...

因買定金飾送禮用,再跌買平d麻...

Jackcal 提到...

Lisa 提到...

唔係想在低位買就可以買到貨的, 分段買啦 :)

Master NLP 提到...

謝Lisa說明加息對舊美債的影響:)

Lisa 提到...

Joe 都說過, 舊美債 free 出來的資金會是爆炸性, 因為實在太多錢了 !

孻姑 提到...

LISA姐,這個媽媽金銀指數記錄好客觀,可以從另一面觀察金銀的升跌和人民買賣情況,真係要俾個LIKE你

Lisa 提到...

謝, 孻姑 :)

Julian 提到...

What makes you decide to record this at this moment? Lol

Lisa 提到...

因為見到媽媽網無人講金 XD !

Julian 提到...

Haha, on the other hand what makes you think we are at 熊三階段? Gold price still pose a 20% gain from $1046 level

Lisa 提到...

因為香港散戶沒入市 XD !

Lisa 提到...

數數手指, 依家得3個網誌寫黃金, 而Joe 寫政治多過講金 XD !

Unknown 提到...

所以Lisa姐一定要繼續寫! X)

Julian 提到...

Whose site is the 3rd one?

Lisa 提到...

http://honsonyip.blogspot.hk/

孻姑 提到...

Lisa姐,又是時候記錄一下媽媽金銀指數喇,我久唔久就會提提你,哈哈
這個2018年已經好少人提超買實金實銀了~~~

honson 提到...

我有買呀🤪

Lisa 提到...

Die Hard 金銀甲 :)

honson 提到...

反正又唔係多,有閑錢咪買下

simon740@ymail.com 提到...

等充假紙金市場爆, 充就係真正金價回歸之時!
另一就係大家都唔想發生既:大災難或戰爭之時!

孻姑 提到...

早幾個月入貨,都諗好似有啲高追,而家諗返好彩當時有買

Julian 提到...

Thanks for recording and reporting these, I think the next few week might be critical if the bulls continue

colin 提到...

最近冇乜人講黃金, 考慮入返D貨