滙豐Amy個男友唔認數

on.cc東網專訊

愈來愈多中小企希望用金融科技提升客戶體驗，滙豐個「數碼峰會」就搞咗個「數碼體驗區」，展示多種新技術之餘，仲邀請咗一位靚女機械人Sophia撐場。

首次出黎見傳媒嘅滙豐香港工商金融主管趙民忠（Terence）就即席同Sophia傾咗幾句，Sophia對滙豐工商金融都有幾分認識，對答算暢順，講到興起，Terence仲邀請佢做同事，不過就畀Sophia請佢「食檸檬」，話要問過老闆先。其實Sophia係由港產機械人製作商Hanson Robotics所創，今次只係純粹黎撐場咋。

見唔到Sophia大家又唔使失望嘅，因為滙豐工商金融早於今年1月已經請咗聊天機械人（Chatbot）Amy做同事，Terence話，Amy好幫得手，至今已經接收了3.8萬個問題，解答成功率高達84%，好抵請架！

Terence仲話，好多人對Amy私生活好有興趣，耐唔耐都收到好似「你有冇男朋友啊？」呢類私人問題。記者即刻向Amy查詢，佢話已經有男朋友喇，仲係英國滙豐度做野。唔通係英國滙豐個Chatbot阿Andrew？再向Andrew求證，點知佢話自己係單身！究竟Amy男友係邊個？唔知喇，不過都係個句，Amy正職係解答工商金融問題。