說好的美股反彈終於來臨，標指上周掟至3491點後，上日一度挾至3762點，即從低位反彈最多7.8%，但隔晚未能高收，盤中納指更一度倒跌，最終標指只升1.1%，收3719，比近期低位3491升左6.5%，離目標3822 仲有103點或2.8%。
美銀行股季績差
美股近期往上挾，市場認為英國政治財務危機暫時解決，同埋美國一堆銀行股季績理想，但各位戰友不要太認真看待，因為絶對得啖笑。就以銀行股業績為例，上季美銀純利按年跌8%，摩通按年倒退17%；花旗盈利大縮兩成半；大摩、富國及高盛更分別按年跌29%、31%和43%，其實喺差到無朋友。
當然英國問題依然一塌糊塗，雖然換咗個新財相，但英國首相卓慧思政府經過此疫後，已變成跛腳鴨政府，滙率低迷之如，剛下午公布的9月通脹率加快至按年10.1%，創40年高位，大個煲冚九個蓋，米字國都咪話唔頭痕。
日滙債午後異常
日本問題更大鑊，早輪日本十年期國債竟然出現四日零成交，今日更多件不正常事件出現，首先行長黑田東彦表明貨幣政策不以滙率為目標，日YEN貶向150可以理解，但問題是日債息率似乎失控。
其中三年及五年債息急升，五年期更是2015年後最高，20年日債息率也重返2016年高位，若果日債息短期內不再回落，將引致大量以日債做抵押品借錢的銀行、基金及金融機構出事，足以引發全球金融危機。
Q3美季績唔重要
雖然隔晚Netflix季績理想，盤後抽升14.4%，但本輪企業季績表現已不再重要，而家11月聯儲局篤定加息四分三厘，12月再加多四分三厘機會亦高，即喺兩個月內加1.5厘，全球風險資產唔跌才怪，業績絶對左右唔到股價跌勢，頂多出完好業績會彈一日勁，之後又打回原形。
按目前股市形勢下，標指彈上去3822目標無必實現，大家見到又咩唔對路就要執生，大方向仍是睇淡才喺大茶飯，短炒熊彈要運氣及技術支持，目標仍喺下望標指2100至2400。
35年前嘅今日，即喺1987年10月19日，發生全球股災慘劇，當日道指爆瀉22.6%，在目前美元短缺及息口持續攀升下，最終將會觸發股市大跌，別忘記87股災教訓。
編按:作者尹德政(Ricky)，醉心投資美股近十載，最大滿足感來自尋找抵買有實力的世界行業領袖，每逢周三、五在「信報網站」及「港股360」撰文。
rickywan@hkej.com
沒有留言:
張貼留言