1996年深圳遊
同老公和由荷蘭來渡假的父母和六妹帶佢大仔過深圳玩一日 !
1997年赤鱲角機場
當時機場剛起好沒啟用, 同老公跟屋苑團去見識下, 而可以在飛機跑道上行走是難忘的回憶 !
2002年粉嶺花蟲鳥展覽
也是花蟲鳥最靚的一年, 之後一年差過一年, 近年都唔再去啦 !
當時同老公和大仔一家三口去玩, 大孫女剛過一歲, 一度唔見咗佢嚇到一班大人面都青 !
2003年大佛和大澳一日遊
同老公跟屋苑團去玩 !
2004年國慶坐遊艇睇煙花
也是個好難忘的經歷, 當時同老公做同一間證券行, 公司包遊艇自助餐, 帶全員工遊船河睇青馬大橋, 食完自助餐睇煙花, 當時好多人暈船浪, 船要靠岸俾人落實地食野, 而本人也是其中之一 !
2005年沙頭角和吉澳一日遊
是老公外甥女搞的活動, 當時一行人, 本人和老公、外甥女和佢媽媽(老公家姐)、叔仔兩公婆, 坐綠巴去沙頭角行中英街行街食野, 之後行去碼頭坐船去吉澳 !
本人當然要食暈浪丸同時要企在船倉外望遠處避免暈浪 !
2005年西貢一日遊
同老公試坐馬鞍山鐵路線到烏溪沙轉小巴去西貢 !
不過唔識點樣買海鮮, 下次要搵熟人帶路 !
2006年英國遊
2006年女兒在英國結婚, 同老公先坐飛機去倫敦, 在二仔租住的Appartment 住, 大仔一家四口過來同我地一齊去玩同食, 之後坐二仔車去大仔近 Birmingham 買落的屋企住, 而女兒同未婚夫一齊過來join, 大家出去 Shakespeare 家鄉玩, 然後才去女兒在 Manchester 附近租住的 Appartment 住, 到佢地結完婚我地才回香港, 大約玩咗一個月, 而行程橫過全個英國, 還在婚禮時見到本人由荷蘭過來的父母和三位弟弟同侄女 !
仔女細個時要本人同老公車佢地週圍去, 依家佢地長大就輪到佢地來車我地週圍去玩 !
2006年尾二仔回港結婚
二仔同在英國認識的女友在12月回港搞結婚禮, 當時在聖誕節本人和大仔一家四口、 二仔和老公侄仔, 老公無得去因為病咗, 先坐攬車去山頂觀景台, 嫲嫲當然要幫手睇住在BB車睡著的大孫女, 等啲後生可以睇野和影相 ! 之後大家去咗蠟像館睇蠟像, 然後去咗IFC join 二仔女友和外甥女, 食野同shopping !
老公晚上七點打電話來叫本人買藥俾佢, 咁同佢地說要先走啦, 但佢地說一齊啦, 點知班後生一邊行一邊睇野同影相, 還要選由渡輪過尖沙咀, 說會快些, 返到家已晚上十一點, 老公一早去咗睇急症 ! 老公病咗不是因為老咗, 而是因為二仔幾日前食咗蠔仔餅病咗, 帶咗病菌返屋企, 所以依家盡叫佢地由外國返來唔好食蠔 !
2007年馬來西亞吉隆坡三晚四日遊
同大仔一家四口和二仔兩公婆一齊住三套房Appartment酒店, 勁好玩 ! 大家都說有咁樣的屋企就好啦, 唔曬好似香港家住得咁迫 !
去咗雙子塔商場KLCC、KL觀望塔、唐人街、Bukit Bintang 購物街、動物園和上山睇國際煙花比賽, 食野有去商場酒樓也有去唐人街大排檔食 !
本來好滿意的假期, 但回程出咗車禍, 污染了大家快樂回憶 ! 來的時候我地租咗個 Van 仔去酒店, 塞咗一個鐘車先到酒店, 所以由酒店去機埸, 本人唔想再坐 Van 仔, 說要坐火車, 但因為好多行李, 所以仔和新抱叫本人和老公搭火車, 而佢地坐 Van 仔, 好彩因為怕塞車, 所以提早出發 ! 本人和老公在機場等咗成個鐘沒見人, 當時心已好不安, 後來在登機櫃枱接到佢地來電說遇車禍, 是隔離個車撞過來, 成個Van 仔翻轉, 佢地要去醫院檢傷, 好彩都是輕傷, 而大孫女出奇乜傷都無 ! 謝天謝地 !
2008年英國去歐洲坐 Eurostar
當時女兒要生第一胎, 本人同老公決定過去幫佢坐月, 還可以先提早過去玩, 因為幾時生都好難估計 !
大新抱生大孫女和大孫仔時, 因為本人同老公都還在工作, 所以是佢同在英國住的媽媽幫佢手, 而本人在2005年退休, 為了可以拾好間屋企接見女兒由台灣過來的未來老爺奶奶 ! 本人也在2007年叫老公退休, 因為當時租金收入都已夠我地洗用 !
我地當時先飛去倫敦二仔家, 放下大多數行李, 因為好多野都是買俾三個仔女的, 然後坐一早在網上訂咗票的Eurostar 經法國和比利時去荷蘭, 以為好好玩, 點知無直去路線, 要在比利時轉火車去荷蘭, 還要在荷蘭轉兩次火車先到目的地, 到時已快晚上12點啦 ! 依家聽講可以由倫敦直去到 Amsterdam ! 回程就快咗, 因為弟弟車我地去在比利時邊境的火車站, 慳返好多時間 !
呢次在英國住咗約兩個月 !
2008年廣洲遊
呢次唔係本人同老公第一次來廣洲, 因為以前已同父母遊過廣洲見親戚, 而呢次係同老公去行北京路和上下九步行街 !
2009-2010年英國/荷蘭遊
呢次輪到二新抱生第一胎, 所以本人和老公又飛過去英國, 而是在Manchester 落機, 因為想先去女兒家玩, 之後坐火車去Birmingham附近大仔家住下, 才去倫敦二仔家住到細孫女出世 !
次次過去真係要幫手做家務, 洗衫、熨衫、吸塵、煮飯, 還要煮雞酒、豬腳薑, 辛苦過在自己家 ! 所以見到二新抱兩個星期後已夠力自理, 本人上網買咗機票同老公飛去荷蘭同父母和弟妹過新曆年 !
本人去歐洲旅行絕對唔會選冬天去, 但BB要出世無得揀 ! 現要回程去大仔家住, 才去女兒家再去Manchester 上飛機回港, 但因為大雪無火車, 所以要上網留意幾時有返火車, 立刻同老公起行趕去火車站, 又是勁難忘, 行程慘過走難 ! 因為好多班火車取消, 所以一有車旅客不理三七廿一見到位就上, 人和行李都迫滿車廂, 而在半路火車一分為二, 只有半個火車會繼續行程, 所以我地要在落大雪下由後卡轉去前卡, 還要一人拖兩個行李箱, 本人加多一個大袋和一個手袋 ! 在2005年拾屋時本人已傷脊椎, 幾年來都腰骨痛, 提唔起重野, 所以絕對是奇積還可以走得動 !
在大仔家住咗兩日就要再坐火車去女兒家, 當時本人訂咗要去Birmingham轉車, 可以趕上去Manchester 最後一班車, 但去到Birmingham我地企個火車門無開到, 沒落車個車又開咗, 只好在下一站下車轉去對面坐回程, 回到Birmingham 當然要坐的火車已開走, 唯有回去大仔家住多一晚, 第二日要大仔車我地去女兒家, 行程兩個多鐘頭, 路上要去兩次休息站飲咖啡同去廁所 !
呢次都去咗英國兩個月 !
呢次後本人同老公都說, 下次唔再做遊民, 只會去一個仔/女的家, 其他人要過來聚會 !
2 則留言:
謝謝分享
好耐無見 :)
張貼留言