隔晚美股雖然回落，但有大行指全球加息周期明年初可結束，加上美股業績期，唔少企業表現唔差，就算三大指數見回吐，但壓力唔大，暫時仲喺高位整固，港股亦借勢反彈。恒指喺上個月一共跌咗2535點，踏入11月今早一度反彈600點，並成功收復15000關。
恒指高開172點，開市價14859已經係半日低位，其後升幅擴大至最多606點，見15293半日高位，但反彈咗幾百點，又見沽盤出嚟，大市升幅收窄，幾近削半，半日恒指報15033，升346點；國指升110點，報5049；恒科指半日升100點，收2953。以半日曾升過600點計數，半日成交額652.43億元，未算配合到個升勢，難怪高位又掉頭。
藍籌股普遍反彈，友邦(01299)上季新業務價值升7%，股價半日反彈5.1%，重上60元水平；港交所(00388)亦反彈2.4%，不過之前220嘅支持位，有機會變做阻力位。至於主席跳船嘅龍湖(00960)，其控股股東回購500萬美元優先票據，半日升5.2%，但相對早幾日嘅累積跌幅，呢個反彈幅度只係杯水車薪。雖然大部份藍籌股都反彈，但係聯想(00992)半日仍要跌2.7%，藍籌之中表現最差。
雖然隔晚納指下跌，但中概股表現唔差，今日科網股全線造好，有消息指騰訊(00700)大股東南非基金暫無意沽貨，騰訊股價半日升彈5.2%，不過呢個南非佬都試過出爾反爾，千祈咪信到十足十。至於其他科網股普遍向上，升幅至少有2%以上。
蘋果公司績後股價表現唔差，帶動手機設備股連升兩日，舜宇(02382)半日再升6.3%，高偉電子(01415)更炒高7.7%；連一向最弱嘅瑞聲(02018)亦升6.1%，其他手機股閒閒地都升3%以上，小米(01810)半日僅升1.3%已經係最差嘅一隻。
生科股亦有理想表現，龍頭藥明生物(02269)半日升2.7%，已經唔係勁，旗下藥明康德(02359)半日升5.2%，同樣係藍籌嘅中生製藥(01177)半日升7.1%，係表現最佳藍籌股。至於內銀股整體表現較弱，下跌0.8至1.3%不等，不過非國有銀行招行(03968)半日升3.1%，郵儲行(01658)升1.4%，內銀股整體積弱事實難改，皆因內房產業鏈出咗問題，市場係擔心最終內房嘅龐大債務，要由內銀埋單，咁嘅話，內銀股真係瓜多過菜。阿Man講過好多次，唔好貪內銀股息高，有心收息揀中移動(00941)呢啲有穩定現金流嘅股份好過。
今日港股除咗係技術性反彈，仲有原因係人民幣回升，再加上內地傳出有條件開放通關，港股當然借勢挾淡倉，不過內地仍然堅定不移行清零政策，能否復常開放仍屬未知數，反彈就唔追貨，免得通關消息又係空歡喜一場。
麥狄文
(徐狄怡‧證監會持牌人)
沒有留言:
張貼留言