美股上周靠穩，雖然Tesla公布業績後股價下跌，拖累納指跌30點，但道指跟標指保持升幅，美股表現仍硬淨。本周多間大型企業公布業績，包括科企阿馬遜、Google、META、VISA及PG等，加上喺周三凌晨聯儲局議息，均會成為市場焦點。由於美滙指數重上101水平，人民幣再回軟，港股上周跌逾300點後，今早開市一度再跌逾300點。
恒指低開207點，跌穿萬九關嘅同時，10日線(18954點)及20日線(18962點)同告失守，跌幅更一度擴大至319點，見18755半日低位。其後跌幅收窄至128點，可惜10日及20日仍無法修復，其後再度偏軟，目前於18800水平徘徊。恒指半日跌266點，報收18808；國指跌85點，報收6329；恒科指半日跌56點，報收4047。半日成交額縮水至427.75億元，買賣兩閒。
上周三北水錄得165億元淨流入，更買入大量盈富基金(02800)，不過翌日已見北水錄得超過130億元淨流出，轉個頭就沽返走啲盈富基金，今日盈富基金半日跌1.5%，成交額半日35.54億元，暫未知北水買賣情況，收市再睇睇。反正北水都係彈出彈入，即使今日趁低吸納，坐唔暖轉頭又走佬。至於重磅科網股普遍腳軟，ATMJB全日向下，騰訊(00700)半日跌1.5%；阿里(09988)半日跌1.1%，險守90元水平；美團(03690)半日亦跌1.7%；京東(09168)跟百度(09888)半日跌逾2%，暫時都係網易(09999)最強，半日跌少過1%。
金融股今日跌勢亦顯著，港交所(00388)半日跌2.1%，友邦(01299)亦跌2.8%；大笨象(00005)終止七連升，今日都頂唔順，跟埋個市跌，半日跌0.4%。內銀股亦全線下跌，但跌幅少於1%，招行(03968)半日跌2.2%跌勢較為顯者；平保(02318)半日亦跌1.5%。
今日港股甫開市已跌到一仆一碌，主要係內房股又傳來利淡消息，碧服(06098)被CEO減持股份，半日股價急挫逾一成半，而同系碧桂園(02007)半日跌5.8%，龍湖(00960)半日跌一成，三股包辦藍籌跌幅冠亞季軍。而碧桂園一系最近債價亦急跌，其他內房債券表現亦唔好得去邊，股價表現當然亦係死死下。摩通發表報告指，對於最新嘅城中村改造政策沒有太過興奮，認為未排除內房流動性憂慮，同時亦調低個別內房評級至減持。其實阿Man已不厭其煩地多次表示，對內房股一段時間要死心，因為債務問題未解決之餘，銷售亦唔能夠回復正常，即係內房嘅流動性仍然係有問題，無辦法正常營運，講乜嘢保交樓為首要任務，其實都係口號多過一切，實際上內房企業已出現結構性改變，已難回復舊有模樣。
麥狄文
(徐狄怡‧證監會持牌人)
沒有留言:
張貼留言