3發鈔行同步應市 1.21有新鈔換 封利是過新年

蘋果日報

今年農曆新年提早喺1月底來臨，為配合市民封利是嘅需要，三間發鈔行經金管局協調後，齊齊於1月21日起，喺分行提供兌換新鈔服務。近日市民飽受假金牛事件嚇親，發鈔行亦特別講明，市民可自行選擇全新版或者較環保嘅「迎新鈔」。

中銀保證係新版

舊年底警方最早撿獲5張仿真度頗高嘅偽冒金牛，都係中銀2003年版出品，該行早前已宣佈全面回收2003年版千元鈔票，即係包括2003、2005、2006、2007及2008年1月1日所印金牛。
中銀發言人強調，市民若兌換千元新鈔過年，必定係2010年版嘅最新印刷鈔票，唔會再有2003年版迎新鈔，其他幣值鈔票，就由客戶自行選擇全新鈔，還是流通緊但新淨嘅迎新鈔嘞。

金管局話，3間發鈔行會喺農曆新年前，即於1月21日起，同步開始提供換鈔服務，該局亦確保銀行有足夠現鈔同人手應付需求。
發鈔量佔比最少嘅渣打同日喺所有分行，準備新鈔加迎新鈔兌換服務，客戶若果鍾意揀2010年新版金牛，發言人話銀行會配合客戶要求提供新版金牛兌換。
中國人傳統，新年慣用新鈔票封利是，寓意萬象更新，不過年年咁印新鈔，都唔係好環保，而且香港流通嘅鈔票，一般都幾新淨，唔似人仔咁用到成箸菜。
因此，金管局就喺2006年起，建議市民多啲使用迎新鈔封利是，2010年金管局仲玩噱頭嘢，舉辦迎新鈔對聯比賽㖭。