香港有乜地方嚴禁帶銀紙出入？

on.cc東網專訊

【on.cc東網專訊】 香港有乜地方係唔准帶銀紙出入呢？就係印銀紙嘅地方。金管局總裁陳德霖今日帶隊同傳媒參觀保安嚴密嘅香港印鈔公司，入廠前，隨身物品先要一律放低，電話相 機唔使講，連身上鈔票都要先擺低，否則「出廠」搜身時，一旦有銀紙喺身，一律充公。

印鈔公司保安點嚴密法？聽住喇。廠外圍有鋼製鐵柵、數碼錄影監察、金屬探測系統、防撞路障同石躉......入工場時仲要過多兩度厚重鋼閘，過咗第一道，仲等啲人員關好，先開第二道，即是同睇戲啲人入金庫差唔多；工場入面更有每日24小時全年無休嘅監控嘅控制中心。睇戲睇得多，不法之徒偷印鈔技術會狼過一般大盜，皆因曉印銀紙梗好過齋偷銀紙，所以印鈔保安先咁嚴密。查實，安全防線唔止工場咁簡單，香港印鈔嘅原材料供應商來自世界各地，而且只賣畀經政府核實嘅法定印鈔公司。想買原材料偷印港紙，可能難過買鈾元素。唔講大家未必知，港鈔除咗防偽特徵夠堅之外，仲經過最嚴格嘅檢測：就係喺攝氏90度高溫下用工業用洗衣粉洗足兩個鐘，無破損先可以出街。大頭蝦將啲銀紙連埋衫褲扔咗落洗衣機？唔使驚，係港紙的話。