呢半年, 真是會好動盪, 所以投資守好過攻 !
on.cc東網專訊【on.cc東網專訊】 富昌金融研究部總監譚朗蔚在東方產經「魚缸趣譚」專欄中表示，上回分析咗「後侵侵時代」資金加速回流美國的新趨勢，有人就問：美元強，對美國經濟有利的嗎？今日，我有必要就美元的強勢寫番5、6百字，事關有一件極具象徵性的事情發生咗，就是美匯指數於周三一度觸及過100.5588，創了十三年以來的新高。喂，留意係十三年來，而唔係2013年喎！你仲未感覺得到事態嚴重咩？
為了方便那些平時無追開我文的朋友仔，我再重申一次「後侵侵時代」的經濟脈絡，那就是侵侵「話」美國會大興土木，之後引發市場對通脹的預期升溫，再之後刺激美債的孳息走高，再再之後提振了美元匯價，最後就是全球的資金湧入美國。
美元破頂，不利出口。有人就會問：美國有出口嗎？乜唔係全球有99%的貨品，上至真iPhone、下至假iPhone都是中國製造的嗎？！你錯喇，美國其實是出口好多飛機大炮同高科技電子零件的！你又會問：豈不是他們的盈利前景會轉差？今次你啱喇，不過侵侵上台其實要對付硅谷這個已經不是新聞嚟，你第一次聽咩？
那美元強勢對美國本身有甚麼好處呢？哇，好處就多囉！美元大漲加速了各國走資，君不見我們阿爺近來走資走到人民幣都大冧，被迫要沽出美債來救匯，個外匯佔款仲連跌咗12個月！再咁發展落去，唔單只中國對美國的威脅會瓦解呀，就連中國的經濟都……
侵侵曾經於競選的時候講過(假設佢唔會走數的話)大幅減稅，將企業稅從35%降到15%，又利用稅務的優惠誘使美國企業於海外的資金回流。到時，美國將會成為一件強力的吸金鐵，全球各國的手上都無晒美金喇，貿易？你拎條鐵交換呀？提提你：1997年金融風暴、2008年金融海嘯，其觸發點正正就係要錢無錢囉！
富昌金融研究部總監 譚朗蔚(作者為註冊持牌人士)
沒有留言:
張貼留言