on.cc東網專訊
【on.cc東網專訊】
一插即破壞電腦！《東網》月前曾報道過嘅一款「USB
Killer」手指，據《東網》最新消息，現在已經正式量產，人人可以買得到，而且網上價錢僅售50美元(約390港元)。適逢今個月底就係聖誕節及元旦假期，呢隻「USB
Killer」手指，擺到明係想食正佳節當前，大賺特賺啦！
相信一向有留意開《東網》嘅朋友都知道現時有一款電腦殺手嘅小型產品--「USB Killer」，外表只是一隻USB手指，但實際上只要插入電腦，最近就連遊戲機甚或智能手機，都會即時冒煙，輕則毁掉USB插口，重則電腦及遊戲機主機板、手機都會燒掉！
呢隻「USB
Killer」原理好簡單，內置電容會在充滿電後向USB接口釋放高達220V的負電湧，足以燒毀USB接口，甚至主機板。而且如果一次沒毀掉目標設備，「USB
Killer」更會多次釋放負電湧，直到電容沒電為止。最終結果就係你部電腦螢幕即時黑晒，冒煙同燒掉！
聖誕節可謂普世歡騰嘅大日子，如果收到神秘禮物，打開睇睇咁啱又係一隻USB手指嘅話，大家就要小心了，因為呢款產品喺測試中已經成功殺掉ThinkPad舊款手提電腦、全新MacBook
Pro、Xbox One及Google Pixel手機。到其時，試幻想一吓，俗稱「拆禮物日」(Boxing Day)嗰日，一隻隻「USB
Killer」一一插破各位部電腦、遊戲機同埋智能手機，連環大爆炸，真係都唔知好嬲定好笑了！
講開呢隻咁抵死嘅「USB
Killer」，究竟佢喺乜野人發明出嚟架！原來資料顯示，家陣開始量產嘅「USB Killer」已經係2.0版本，而第一代嘅「USB
Killer」係嚟自一位俄羅斯研究人員Dark Purple，據指其實係一Team人嚟嘅，佢地去年曾經製作出一款「USB
Killer」手指，而且其後更開發出一個2.0版本，只需插在電腦或其他裝置上便可即時將底板燒毀，令它們再無法運作。
之不過，原來呢款又可以稱佢為電腦界「攞你命3000」嘅「USB Killer」，我哋香港嘅朋友幾個月前亦曾將佢發揚光大，並曾悄悄在市場上售賣。現在市場上售賣嘅第二代，估計由呢位香港朋友嘅公司進行量產添。
呢位香港朋友早前曾接受《東網》記者查詢時聲稱，產品並非用於邪惡目的，而是用來測試被插入的電子設備能否抵禦電源功率劇變的惡性攻擊，並指，市面上95%有USB插口嘅電子裝置(包括電腦、手提電話、電視等)，都過唔到「USB Killer」嘅測試。
奈何，呢位香港朋友自從上次回應過記者簡單問題後，直到現時量產了，記者現仍未能再成功聯絡到他！
沒有留言:
張貼留言