搞笑 !
on.cc東網專訊咪以為專業金融人咩大市風浪都見過，做咩交易都諗住往後有N個準備，查實當為自己嘅血汗錢「騰」起上嚟，金融財俊一樣會散戶上身。小記就聽到一個金融財俊揸住百幾萬Cash，差啲唔知點存返入入銀行嘅故事。
雖然金管局一直努力令香港銀行同貨幣穩定，不過一樣唔少人睇淡，群鱷上年想沽空港元之際，就連散戶都驚埋一份，猛話「識揸一定揸美金」。小記收到風，有位中環專業人士覺得社會動盪，決定轉揸美金現鈔，規模成20萬美金(約156萬港元)，即係2,000張100美元現鈔。
呢位專業人士擺咗啲錢喺度兩年，見到股樓齊升，呢幾個月想存返入銀行，先發現自己中晒伏！
點解？銀行家朋友喝住佢，話近年銀行反洗錢好嚴格，身家乾淨要開戶都隨時畀銀行問到反艇，拎咁大袋現金，仲要係美金入銀行，閣下肯肯定似洗錢多過似007，隨時畀銀行即時報警做可疑交易，到時畀人問到「點解拎咁大額現金」時點答？唔通話唔信香港銀行體系同金管局？就算身為金融人嘅閣下講得出口，呢個理由都唔會有人Buy囉。
其實大額現金提存一直都係銀行重點關注交易，你唔知唔出奇，但佢係金融專業......
結果佢要周圍求救，班銀行家Friend最後就教路，要搵返親戚朋友幫佢分批將20萬美元先兌番做港元，然後每人再分批、分幾個月畀返佢，再存返入銀行，而且每次開票同轉帳都要唔同銀碼，希望觸動銀行神經嘅機會大大減少。
結果？呢個仁兄就過咗一個好充實嘅雞年新春，咪就係拜年時周圍同姨媽姑姐兄弟拍膊頭「唔該幫幫手去銀行兌返做港紙畀我」！
沒有留言:
張貼留言