隔晚美國10年債息逼近4厘，議息前夕市場擔心聯儲局再放鷹，加上俄烏局勢升溫，美股隔晚三大指數下跌。而人民幣離岸價跌至24個月低位，港股今早再走軟，創逾六個月低位。
恒指低開142點，見18638已經係半日高位，其後沽盤再將大市推低至18451半日低位，最多跌329點，見六個月新低。其後跌勢喘定，半日恒指收報18496，跌284點；國指跌120點，報6285；恒科指跌95點，收3758。半日成交額只有389.78億元，成交疏落反映沽壓唔算嚴重嘅同時，低位亦無人願意入場接貨。
藍籌股普遍偏軟，雖然息率高企，大笨象(00005)跟友邦(01299)呢啲金融股亦要跌，兩股分別跌0.9%及0.4%。雖然騰訊(00700)否認考慮沽美團(03690)，美團半日仍要跌2.6%，不過家下仲守到喺160元水平之上，已經算係咁。京東(09618)半日跌2%，暫時險守220水平，不過騰訊已穿前底，半日跌1.4%，走勢每況愈下。阿里(09988)半日跌3.6%。碧桂園(02007)被評級機構調低信貸評級，股價半日跌近4%，碧服(06098)更跌近5%。其他藍籌股普遍隨大市下跌，表現都係瓜多過菜。
光伏股今日沽壓較顯著，信義光能(00968)半日跌7.5%，藍籌之中表現最差，同系信義能源(03868)亦跌4%。其他光伏股半日跌幅由超過1%至6%不等，明明係國策支持嘅股份，都難逃一跌，可見市場氣氛差到乜嘢環境。
俄烏戰事再升溫，原油運輸指數(BDTI)連升七日，航運股有追捧，中遠海能(01138)升至超過11年高位，半日彈升7.6%。其他航運股亦因為波羅的海乾散貨指數上日急升11.3%造好。不過當經濟下滑，俄烏局勢緩和，估計航運股嘅升勢就難以持續，呢啲位當然唔建議再追貨。
市場傳出港府喺短期內將再度放寛入境檢疫政策，而放寛政策亦有傳已獲阿爺開綠燈，復常股繼續逆市造好，國泰(00293)半日升逾3%，升至9元水平，部份零售股亦見造好，只係成交方面仍未見配合，始終整體市場氣氛未有改善，放寛入境能夠刺激旅客數字回升亦係未知數，只係放鬆總好過唔放，唔排除一有公布，呢啲股份可能挾多一浸趁好消息出貨。
目前大市已逼近3月低位，但仍未見有資金入場撈貨，可見缸邊友對大市已死心，所謂嘅3月國家政策底，有機會不堪一擊。不過唔排除宣布放寛入境檢疫，又會借勢挾淡倉，做淡友都未必可以舒舒服服坐住贏，總之造好造淡都難搵食，唯有耐心等候，袋穩現金方有能力捱過熊市寒冬。
麥狄文
(徐狄怡‧證監會持牌人)
沒有留言:
張貼留言