m18講場：金融業冷風吹唔到嘅位係......

on.cc東網專訊

【on.cc東網專訊】 見金融業寒冬，一係凍薪一係裁員無前途？咁又未必。只要夠後生，又係做金融科技(Fintech)，就大有前景，個冷風唔吹嗰邊嘅。

金融管理局周五出嚟介紹佢哋個最新人才培訓計劃，就係特別為金融科技而設，11間銀行全力撐，今年暑假提供70個實習機會畀大學生提早入行，其中有3個位仲係出自金管局嘅添。可以諗諗喎，即日至明年2月4日接受報名。

間間銀行都好重視發展科技。唔信？睇周五滙豐銀行香港區行政總裁施穎茵(Diana)同恒生銀行行政總裁李慧敏都現身撐場就知。呢11間銀行仲話，未來3至5年要請500至700個金融科技專才！所以入行真係諗得過。

香港淨係得「金融中心」呢個招牌，今時今日未必夠照，一定要升級至「金融科技樞紐」先得。仲「十年樹木，百年樹人」？依家咩都一日千里，金管局都話要改變心態，要以「十年樹人」嘅速度去培育金融科技人才。不過眼見香港目前嘅競爭力，小記恐怕唔等得十年咁耐喎。