靚太主席呻 大粒鑽石滯銷

蘋果日報

內地反貪腐，高檔零售業首當其衝，謝瑞麟珠寶（417）當然受到影響，靚太主席謝邱安儀噚日公佈中期業績時都話，十幾萬元嘅中上貴價鑽石最滯銷，內地所有城市嘅情況都差唔多，冇話幾多線嘅城市好啲。
謝邱安儀指，上半年一卡以上嘅鑽石銷情比舊年同期，錄得單位數跌幅，當中以十幾萬元嘅鑽石銷情最差。貴嘅賣唔去，唯有諗計賣大眾化些少嘅貨，好似足金首飾、白金、18K素金首飾之類。雖然足金嘅毛利率較低，但係密食當三番。
另外，本月內地開始實施旅遊法，旅行團數目下降對謝瑞麟嘅旅遊展銷部生意亦有一定影響，公司希望做好信譽，長遠吸到客。其實做生意最緊要識得靈活變通㗎啫。