暑期陷阱：賤價派傳單恐踎監

on.cc東網專訊

【on.cc東網專訊】 暑假期間，網上充斥日薪出糧，要員工假自僱的求職陷阱!多間公司在網上賤價招聘年輕人，要他們自己想方法，到公屋或居屋各單位派傳單，2名升中六的學生， 就趁公屋保安員不留意時，尾隨住戶上樓，向40層近千個單位，逐一派發傳單，工作5小時，每人僅得60元。法律界警告，擅闖民居有機會被控遊蕩或企圖爆竊 罪，隨時會身陷囹圄，年輕人切勿因小失大。
「我以為派傳單好容易，冇諗過上樓派傳單係咁辛苦，又要避過保安員，遇到住戶時，仲要扮嘢直行直過，諗番起，都驚畀人捉到！」2名今年9月升中6的男學生David(化名)及Kingsley(化名)，2個月前在網上看見某間傳單公司的招聘廣告，以為很易賺錢，便去應徵。Kingsley稱，當日到該公司應徵時，被要求填寫自僱僱員合約，又要拍下正面照片。「職員畀咗一疊傳單我哋，要我哋先到附近唐樓試派幾層，然後用相機影低，返公司畀佢哋睇下啱唔啱。試派成功後，我哋被指派到某幢公屋派發傳單。派一幢公屋，2人共收120元。」「職員同我哋講個名，冇同我哋講係去邊類住宅，叫我哋自己上網搵，原來係去九龍區一公屋！」David擔心會被保安員或住戶趕走，惟職員着他們放心，「職員話如果有保安阻止就返公司，佢會再安排我哋到第2個地點派。萬一上到去畀人捉到，就自己諗辦法返公司。」2 人抵達後，發現該幢公屋有40層，每層有20個單位，約有800個單位，他們趁保安員不在，便尾隨住戶乘升降機上樓。「我哋去到1個單位閘門外，就將傳單 攝入去。」Kingsley指，公司要求他們拍攝照片做記錄，每層10張，8張為住戶門口，2張為樓層。「當日差唔多有攝氏30度，我哋揹住10磅重嘅單 張，派咗5個鐘，差啲中暑，仲成身散晒！」「最 初以為好快做完，事後返公司收120元，除一除，2人5小時工作，每人時薪只係12蚊，較法定最低工資30元少得多!」他們又指，「有朋友派咗20層傳單 後被保安員發現，好彩保安只係要求佢離開，冇報到警，唔係一身蟻!呢次之後，一定不會有下次。」同時，此類招聘廣告在網上被受抨擊，有網友認為要人自僱， 就是想逃避責任。記者致電該間公司查詢，經理聲稱當日職員「拿錯」自僱表格給2名年輕員工，又指公司有為員工買勞工保險，並會支付最低工資，每小時30元。被問員工是否擅闖民居時，該名經理指曾諮詢法律意見，認為只是派傳單，沒有問題。惟 執業大律師陸偉雄指出，擅闖民居派傳單，後果可以很嚴重，「未經批准擅闖大廈，住戶若有財物損失，可向闖入者追討金錢賠償，若被懷疑擅闖大廈有其他目的， 更可被控遊蕩罪。」立法會議員王國興指出，網上充斥暑期工陷阱，批評勞工處監管不力，要求加強巡查，避免青少年誤墮法網。