李小加，民企已死，你玩夠未？

都說股市好多人為因素, 你玩股定股玩你 ? 每一個浪都出一樣的結果, 無數散戶輸錢 !

蘋果日報

民企股越爆越大鑊，股榮知道企業有心造假，避也避不過，但令人惱火的，是作為負責維持秩序的港交所（ 388），對事件不聞不問。 CEO李小加一個多星期前指，「（博士蛙， 1698）是個別的特殊情況，並非制度上出現系統性問題，不會因為個別公司而修改資料披露的守則，但若果發現機制上存在問題，才會作出改善。」
博士蛙爆完，輪到大慶乳業（ 1007），然後民企股一隻接住一隻停牌，又或者跌到阿媽都唔記得。請問李小加，這是否仍然是個別情況？是否要等到民企股全部停晒牌，你先肯出手？
綜合過去半個月幾隻民企股出事，我發覺原來一直自誇與全球股市接軌，跟足國際監管模式的港交所，其實虛有其表。只是單單停牌機制，已經令萬千股民中伏。單睇博士蛙上月 15號開市前發通告，指核數師劈炮而毋須停賽，已經荒謬絕倫，更離譜係，午後到 12點半，先再補充資料話四億數有問題，中午又毋須停牌，等午後開市 38分鐘先落閘。
一個上午加午後 38分鐘，基金走得到，散仔以為執到寶，點知一個個變晒儍仔。我相信當日低撈博士蛙的散仔都係衰貪心，但時到如今，大部份恐怕輸得唔甘心。點解？同屬德勤核數的大慶，上月 22號開市前指核數師跳船，開市前已宣佈停牌。李小加，請你解釋點解同樣係核數師辭任，一個要停牌，另一個毋須停，究竟你搞邊科？

股份停牌無劃一準則

另一個例子仲激氣，歲寶（ 312）上月 21號話核數師須更多時間做嘢，放榜日期延至上周五（ 30日），殊不知 29號中午話停牌就停牌，聲稱有敏感消息， 30號晚反口指出唔到業績。同樣 30號放榜的宇陽（ 117）， 29號喪插兩成後、未有提及周五不能放榜即停牌，反觀華保（ 810）較早前亦指核數師須更多時間審核，未能 3月底前放榜，毋須停牌。
問過核數師，除非是公司未能提供資料，否則一定能在死線前一星期，大致完成核數工作，因此部份公司如寶姿（ 589）、澳優（ 1717）臨放榜前一日先話核數師要更多時間，完全難以令人信服。更可怕是貨源歸邊的喜尚（ 8179），五日跌八成，居然唔知原因毋須停牌。
民企冰封三尺，非一日之寒。港股加時無啖好食，我可以忍；偏幫烏輪輸打贏要，最多唔買輪唔買動物，但現時連遊戲規則都左搖右擺，停牌機制名存實亡，股榮真的忍受不了。李小加，今日係愚人節，但以上的說話卻很認真，我相信普羅投資者要的，是公平的制度，並非甚麼新股集資王、衍生工具王等，請認真好好由基本步出發。

股榮