金管局：Bitcoin唔係錢

蘋果日報

虛擬貨幣Bitcoin最近喺內地熱炒，金管局總裁陳德霖上周五出席立法會會議後已經提醒市民，Bitcoin唔係貨幣，唔受金管局監管。金管局可能擔心市民收唔到，噚日再出聲明，強調Bitcoin未有足夠條件成為支付媒介或者電子貨幣，仲係高度投機性商品。簡言之，就係叫市民咪見人炒，又走去炒埋一 份。

出聲明叫咪炒作

金管局嘅聲明內容基本上跟陳總上周所講差唔多，重申Bitcoin唔係貨幣，只係虛擬世界創造嘅「商品」，可以喺私人或網上平台交易，或用以物易物方式買賣。
但由於Bitcoin嘅價值冇實物或發行人支持，而且價格波幅非常大，所以冇足夠條件成為支付媒介或電子貨幣。
金管局更加認為，Bitcoin屬於高度投機性商品，所以呼籲市民考慮以Bitcoin交易或投資時，要加倍小心。