丁世民講股 明年最低見萬二

蘋果日報

年尾流流，間間大行都唱好出年恒指，話會爆升之餘，目標冇兩萬九都有兩萬八。直至噚日，華華卒之聽到個好驚喜（查實係驚恐）嘅預測。
敦沛金融（ 812）行政總裁丁世民話，恒指出年第一季會跌穿兩萬二，之後升番上兩萬五引人入市，年中又再跌鋪勁，跌到落萬二！冇錯，係萬二！點解咁恐怖？丁生話，歐美經濟唔掂，內地收水抽走熱錢，港股下年一啲都唔樂觀。
反而，佢認為買金制得過。佢哋個業務總監張子恒就補充，美國佬銀紙印唔停，搞到各國央行要買金對冲番啲美元儲備，估計出年第一季金價會升上每盎司 1500美金，年中可能會升上 2000㖭……到底丁生係語不驚人死不休，定係獨具慧眼呢？出年先有分曉！

(李華華)